गुल्मीका दुई गाउँपालिका रुरुक्षेत्र र छत्रकोट जोड्ने मितेरी पुलको उद्घाटन

डिबी खड्का, गुल्मी: गुल्मीको रुरुक्षेत्र गाउँपालिका र छत्रकोट गाउँपालिकालाई जोड्ने मितेरी पुलको उद्घाटन गरिएको छ। बुधबार रुरुक्षेत्र गाउँपालिकाका अध्यक्ष यदु ज्ञवालीले एक कार्यक्रम बिच पुलको उद्घाटन गरेका हुन। पुल उद्घाटन गर्दै अध्यक्ष ज्ञवालीले पुलले दुई स्थानीय तहको भूगोललाई जोडेर सुविधा दिनुका साथै हाम्रो मनलाई पनि जोडेर थप आत्मियता बढाए बताए।

पुल निर्माणमा रुरुक्षेत्र गाउँपालिका र छत्रकोट गाउँपालिकाको समान ६ लाख २५ हजार/६ लाख २५ हजार गरि १२ लाख पचास हजार लगानी रहेको छ भने , एक लाख ७५ हजार तीन सय ४९ रुपैयाँ बराबरको श्रमदान स्थानीयले गरेका थिए।

गोमा निर्माण सेवा कम्पनीले डेढ महिनामा उक्त पक्की पुलको निर्माण काम सम्पन्न गरेको निर्माण व्यवसायी भेषराज गौतमले बताए।

५ दशमलव ५ मिटर लम्बाई र ४ मिटर चौडाई रहेको यस पुलले रुरुक्षेत्र गाउँपालिकाको वडा नम्बर ५ बम्घा र छत्रकोट गाउँपालिकाको वडा नम्बर एक हुँगालाई प्रत्यक्ष जोडेको छ।