आफ्नो वैवाहिक वर्षगाँठको अवसरमा गुरुङ दम्पतीद्वारा विपन्न विद्यार्थीलाई न्यानो कपडा वितरण

गुल्मी: पछिल्लो समय विवाह, जन्मोत्सव र विवाह उत्सव लगायतको बहानामा होटलहरुमा लाखौँ खर्च गर्ने प्रवृति बढिरहेको छ। तर, एक दम्पतीले ८० जना विपन्न विद्यार्थीको जाडो छेकेर ४० औँ विवाह बर्षगाँठ मनाएका छन्।

रुपन्देहीको सिद्धार्थ नगरपालिका-१२ का अमृतमान गुरुङ्ग र श्रीमती शारदा गुरुङ्गले गुल्मीको छत्रकोट गाउपालिका-१, हुँगा स्थित देविस्थान आधारभुत विद्यालयका विपन्न वर्गका साना बालबालिकालाई ८० थान ट्र्याक्सुट प्रदान गरेका हुन।

ब्रिटिस वेलफेयर गुल्मीका प्रमुख गम बहादुर थापाको समन्वयमा गुरुङ्ग दम्पतीले सहयोग गर्दै आएका छन् । गुरुङ्ग परिवार लामो समयदेखि बेलायतमा बस्दै आएको छ। गत बर्ष बाग्लुङ्ग जिल्लाको निसिखोला गाउँपलिका-३ को याङ्ग्म्याङ्ग स्कुलका विद्यार्थीहरुलाई पनि दम्पतीले स्कुल ड्रेस प्रदान गरेका थिए ।

देबिस्थान आधारभुत बिद्यालय छत्रकोट गाउपालिका-१ हुँगाका विद्यालय व्यवस्थापन समिति अध्यक्ष विष्णु बहादुर गाहाले जिल्ला बाहिरको नागरिकले देश बाहिरबाट गरेको सहयोगले निकै उत्साहित भएको बताए। उनले अधिकांश दलित र गरिब परिवारका छोराछोरीले जाडोमा कष्ट खेपिरहेको अवस्थामा गुरुङ्ग दम्पतीले बिबाहउत्सवको खुुसी ती बालबालिकासम्म पुराएर पुण्य प्राप्त गरेको गाहाले प्रतिक्रिया दिए।