तानसेनले गर्यो अन्तर्राष्ट्रिय नारी दिवसको अवसरमा सरसफाईकर्मी र कार्यालय सहयोगी कर्मचारीलाई सम्मान

पाल्पा: तानसेन नगरपालिकाले ११४ औँ अन्तर्राष्ट्रिय नारी दिवसको अवसरमा सरसफाईकर्मी र कार्यालय सहयोगी कर्मचारीहरुलाई सम्मान गरेको छ। लक्षित वर्गको कार्यक्रम अनुसार विपन्न सरसफाईकर्मी र सहयोगी कर्मचारीको सम्मान गर्ने कार्यक्रम तय गरे अनुसार सम्मान गरिएको तानसेन नगरपालिकाका उपप्रमुख प्रतिक्षा गाहा सिंजालीले बताउनुभयो।

उहाँले सोही कार्यक्रमकै अवसरमा सरसफाइकर्मी र कार्यालय सहयोगी गरि ५१ जनाको स्वास्थ्य परीक्षण, लागु औषध तथा दुव्र्यसन सम्बन्धि प्रशिक्षण समेत दिएको बताउनुभयो ।

स्वास्थ्य सचेतना अभावले सरसफाईकर्मीहरुलाई जटिल रोग लाग्ने गरेको छ। गतवर्ष मात्रै तानसेन नगरपालिकाको कार्यकालमै २ जना कर्मचारीको रोग लागेर निधन भएको गाहाले जानकारी दिनुभयो । रोग लाग्न नदिन तथा सरसफाई र स्वास्थ्य सम्बन्धि चेतनाको साथै उनीहरुको कामको सम्मानको लागि सम्मान तथा प्रशिक्षण नगरपालिकाले गरेको हो।

कार्यक्रममा कार्यालय सहयोगी ३२ जना, सरसफाईकर्मी १९ गरी ५१ जनालाई सम्मान गरिएको थियो । कार्यक्रमका प्रमुख अतिथि तानसेन नगरपालिकाका प्रमुख सन्तोषलाल श्रेष्ठले समुदाय स्तरमा सरसफाईको काम गरेका र कार्यालयको व्यवस्थापनमा खट्ने तल्लोतहको कर्मचारीको मनोवल वृद्धिको लागि यस्तो खाले कार्यक्रमलाई आगामी दिनमा पनि निरंतरता दिने बताउनुभयो । कार्यक्रममा स्वास्थ्य शाखा प्रमुख झविन्द्र बस्यालले स्वास्थ्य सम्बन्धि ,यस्तै जिल्ला प्रहरी कार्यालय पाल्पाबाट लागु औषध दुव्र्यसनी सम्बन्धि र संविधान सभा सदस्य लिला सोमैले महिला अधिकार र कर्तव्य तथा कानूनी व्यवस्थाको विषयमा प्रशिक्षण दिनुभएको थियो ।

कार्यक्रममा नगरपालिकाका जनप्रतिनिधि, कर्मचारी,पत्रकारहरुको सहभागितामा कार्यक्रम सम्पन्न गरेको हो ।