विनोद वि.क.को उपचारका लागि सकंलित रकम हस्तान्तरण

सागर भण्डारी, गुल्मी: क्यान्सर रोग पुष्टी भई हाल वि.पि. कोईराला मेमोरीयल क्यान्सर अस्पताल भरतपुरमा उपचार गराईरहेका खेलाडी बिनोद बि.कको उपचारका लागि सकंलित रकम हस्तान्तरण गरिएको छ ।

मुसिकोट नगरपालिका वडा नं ५ स्थायी घर भई जिल्ला तथा प्रदेश स्तरमा भलिबल खेल खेल्दै आईरहेका बि.कको पारिवारिक आर्थिक अवस्था कमजोर रहेकाले उपचारमा सहयोग सकंलन अभियान थालिएको थियो।

मुसिकोट नगर खेलकुद विकास समिति अध्यक्ष सन्दिप खत्री र मुसिकोट नगरप्रमुखका स्वकीय सचिव सुरज भट्टराईद्धारा सञ्चालित अभियानमा देश विदेशबाट सकंलित १ लाख ७० हजार रुपैयाँ बि.कको परिवारलाई भरतपुर नै पुगेर हस्तान्तरण गरिएको हो।

यो पनि: गुल्मीको मुसिकोटका भलिबल खेलाडी विनोदलाई क्यान्सर, सहयोगका लागि अपिल

कुल सकंलित रकम २ लाख ३८ हजार भएपनि सम्पूर्ण बोल रकम अझै उठ्नेक्रम जारी रहेकाले उपचारमा केही सहयोग होस् भनेर उक्त रकम हस्तान्तरण गरिएको अध्यक्ष खत्रीले जानकारी दिनुभयो।

सहयोग रकम हस्तान्तरण कार्यक्रममा खत्रीसगैं मुसिकोट नगरपालिका वडा नं ७ का वडाध्यक्ष हरिहर सापकोटा, वडा नं ८ का पूर्व वडाध्यक्ष नारायण सापकोटा, युनिक खबरका प्रधान सम्पादक रामकृष्ण कंडेल लगायतको उपस्थिति रहेको थियो।

विनोदको अहिले किमोथेरापी चलिरहेको छ । उनको स्वास्थ्यमा केही सुधार भएको पारिवारिक श्रोतले जनाएको छ । उपचारमा अझै पनि ठुलो धनराशी लाग्ने भएकाले सहयोगका लागि सम्पूर्णलाई अनुरोध गरिएको छ ।