निर्मला पन्तको हत्यामा संलग्न भएको आशंकामा एक भारतीय युवा पक्राउ

काठमाडौं: कञ्चनपुरमा ३ वर्षअघि निर्मला पन्त हत्याका एक संदीग्ध पक्राउ परेका छन्। प्रहरीले ती व्यक्तिलाई भारतबाट पक्राउ गरिएको बुझिएको छ।

पक्राउ पछि १५ दिनअघि नै नेपाल ल्याइएका भारतीय नागरिक निकाल अलीबारे विस्तृत अनुसन्धान भइरहेको बुझिएको छ। हत्यामा उनको संलग्नता लगभग निश्चित भएको प्रहरी स्रोतले जानकारी दिएको छ।

डिएनए परीक्षण भइरहेको र मिलेमा उनलाई सार्वजनिक गर्ने बताइएको छ। निकाल अली निर्मला पन्त हत्या भएको ठाउँ नजिकै तरकारी खेतीमा लागेको बताइएको छ। हत्यामा उनी संलग्न भए नभएको निर्क्यौल गर्न प्रहरीले तथ्यहरु खोजेको र डिएन रिपोर्टमा भर परेको बुझिएको छ।

१० साउन २०७५ मा कञ्चनपुरको भिमदत्त नगरपालिकाकी १३ वर्षीया निर्मला पन्तको हत्या भएको थियो। उनी साथीको घरमा पुगेर फर्कदै गर्दा बलात्कारपछि हत्या भएको थियो।