मुसिकोटमा झिनियाको कारोवार बढ्दो, तिहारमा मात्रै ३० लाखको व्यापार

कौरव खत्री, गुल्मी: गुल्मीको वामीटक्सार बजारमा तिहारको समयमा झिनियाको व्यापारमा निकै वृद्धि आएको छ। मुसिकोट नगरपालिका-७, वामीटक्सार बजारमा तिहार आसपासमा वामीटक्सार बजारबाट मात्रै झण्डै ३० लाख बराबरको झिनिया रोटीको कारोवार भएको स्थानीय झिनिया व्यापारी चिरिञ्जीवी शाक्यले जानकारी दिए।

दशैँ र तिहारको समयमा मात्र खपत हुने झिनिया पछिल्ला केहि बर्षयता झिनिया बाह्रै महिना राम्रो खपत हुने गरेको र अहिले स्थानीय वामीटक्सार बजारमा झिनिया व्यवसायीहरु बढेर झण्डै ७०/८० जना सम्म झिनिया व्यवसायी पुगेको स्थानीय झिनिया व्यापारी शाक्यले जानकारी दिए।

वामीटक्सार बजारमा उत्पादित झिनिया छिमेकी जिल्ला तथा स्थानीय बजार र गाँउघरमा समेत खपत हुने गरेको पाइन्छ।

तिहारको समयमा मात्र आफूले झण्डै डेढ लाख भन्दा बढिको झिनियाको व्यापार गरेको भन्दै झिनिया बनाउन सक्ने हो भने जति पनि झिनिया खपत हुने गरेको र झिनिया बिक्रि वितरण नहोला की भन्ने चिन्ता चाहीँ नहुने मुसिकोट नगरपालिका-७, वामीटक्सार बजारकी स्थानीय झिनिया व्यवसायी विष्णुमति श्रेष्ठले बताइन।