महेन्द्र घिमिरे, गुल्मी: नेपाल कम्युनिष्ट पार्टी एमाले मुसिकोट नगरपालिका, गुल्मीको प्रथम नगर अधिवेशनमा नेपाल कम्युनिष्ट पार्टी एमालेका केन्द्रिय सचिव, पार्टी प्रवक्ता तथा पूर्व परराष्ट्र मन्त्री माननीय प्रदीप ज्ञवालीबाट उद्घाटन गरिने साथै प्रशिक्षण मन्तव्य समेत राख्नुहुने मुसिकोट नगरकमिटी अधिवेशन संयोजक तथा वडा नं. ७ का वडाध्यक्ष प्रकाश काफ्लेले जानकारी दिनुभयो।
नेकपा एमालेले भोलि हुन लागेको ७५३ स्थानीय तहमा नै एकै दिन अधिवेशन सम्पन्न गर्दैछ। सोही अधिवेशनमा ज्ञवाली अधिवेशन उद्घाटन तथा विशेष सम्बोधनका लागि वामी टक्सार आउन लागेका हुन्।
उहाँ आउने खबरले कार्यकर्तामा थप उत्साह थपिएको छ। यो पहिलो नगर अधिवेशन भएकाले पनि यसलाई महत्त्वका साथ हेरिएको छ। एमालेको विधान महाधिवेशन सम्पन्न भएपछि पहिलो पटक हुन लागेको अधिवेशनले अध्यक्ष, उपाध्यक्ष, सचिव र २ उपसचिव सहित ७५ सदस्यीय नगर कमिटी गठन गर्नेछ।
कार्यक्रम सफल पार्न आयोजकले सबैको गरिमामय उपस्थितिको लागि अनुरोध पनि गरेको छ। यस अघि कात्तिक ६ गते वडा अधिवेशन सम्पन्न गरेको नेकपा एमालेले कात्तिक ९ गते रुद्रावती बहुमुखी क्याम्पस, वामीटक्सारमा ११.३० बजे प्रथम नगर अधिवेशनका कार्यक्रम सञ्चालन गर्दैछ।
