गुल्मी सेवा समाज कतारले बृहत् रक्तदान कार्यक्रम आयोजना गर्दै

दोहा, कतार: गुल्मी सेवा समाज कतारले आफ्नो २३औं स्थापना दिवसको अवसर पारेर आगामी शुक्रबार एक बृहत् रक्तदान कार्यक्रम आयोजना गर्ने भएको छ। “रक्तदान, जीवनदान” भन्ने मूल मन्त्रका साथ लुम्बिनी प्रदेश समन्वय परिषद् कतार र नेपाली रक्तदाता संघ कतारको सहकार्यमा यो कार्यक्रम हुन लागेको हो। कतारमा रगत अभावका कारण समस्यामा परेका बिरामीहरूको जीवन रक्षा गर्ने उद्देश्यले नेपाली समुदायले समय-समयमा यस्ता कार्यक्रम गर्दै आए पनि जनवरीको तेस्रो सातायता यस्तो कार्यक्रम हुन नसकेको अवस्थामा यसले ठूलो राहत दिने अपेक्षा गरिएको छ। समाजका अध्यक्ष मित्र बिएसले रक्तदान जस्तो महान् र पुण्यको काममा सहभागी भएर मानव सेवामा हातेमालो गर्न सम्पूर्ण नेपाली समुदायलाई अपिल गरेका छन्। यो रक्तदान कार्यक्रम कतारको सरकारी अस्पतालस्थित ब्लड डोनेसन सेन्टरमा बिहान ८ बजेदेखि दिउँसो १ बजेसम्म सञ्चालन हुनेछ भने थप जानकारीका लागि कार्यक्रम संयोजक दीपक घिमिरेलाई ७७३०८४५० नम्बरमा सम्पर्क गर्न सकिनेछ।

अध्ययनहरूका अनुसार रक्तदान गर्दा अरूको ज्यान बच्नुका साथै दाताको स्वास्थ्यमा पनि सकारात्मक प्रभाव पर्छ। रक्तदानले मुटु रोगको जोखिम घटाउनुका साथै रगतमा कोलेस्ट्रोलको मात्रा सन्तुलित गर्ने र कलेजो, फोक्सो, पेट तथा कोलोन क्यान्सरको जोखिम समेत कम गर्ने सन् २००८ को एक अध्ययनले देखाएको छ। दान गरिएको तीन सय मिलिलिटर रगत शरीरले २४ देखि ४८ घण्टाभित्रै पूर्ति गर्ने र त्यसपछि नयाँ रक्तकोषिकाहरू तीव्र गतिमा बढ्ने हुँदा शरीरमा अक्सिजनको मात्रा र स्फूर्ति बढ्छ। यसका साथै रक्तदान गर्नुअघि रगत परीक्षण हुने हुँदा कुनै सङ्क्रमित रोग भएमा समयमै पत्ता लाग्ने फाइदा पनि छ। ‘ओ नेगेटिभ’ रगत भएका व्यक्ति युनिभर्सल डोनर हुन् जसले जो-कसैलाई रगत दिन सक्छन् र एक जनाले दान गरेको रगतले तीन जनाको ज्यान बचाउन सकिन्छ।

रक्तदान गर्न जानुअघि रक्तदाताहरूले केही महत्त्वपूर्ण मापदण्डहरू पूरा गरेको हुनुपर्छ। रक्तदातासँग कतारी परिचयपत्र, ड्राइभिङ लाइसेन्स वा हेल्थ कार्डमध्ये कुनै एक अनिवार्य हुनुका साथै कतार प्रवेश गरेको कम्तीमा चार महिना पूरा भएको हुनुपर्छ। यसअघि रक्तदान गरेको भए कम्तीमा दुई महिना अर्थात् ६० दिन पूरा भएको हुनुपर्ने नियम छ। त्यसैगरी, रक्तदाता कम्तीमा आठ घण्टा मज्जाले सुतेको, कुनै पनि एन्टिबायोटिक औषधि सेवन नगरेको र पछिल्लो २४ घण्टाभित्र मदिरा सेवन नगरेको हुनुपर्छ। अन्त्यमा, रक्तदान गर्नका लागि व्यक्तिको उमेर १८ देखि ६५ वर्षको बिचमा हुनुपर्ने र तौल कम्तीमा ५० किलो हुनुपर्ने अनिवार्य व्यवस्था गरिएको छ।