बागलुङ: मानव सेवा आश्रम बागलुङ शाखाको भवन निर्माणका लागि आयोजना गरिएको श्रीमद्भागवत सप्ताह ज्ञानविज्ञान महायज्ञ-२०८२ को तयारी तीव्र पारिएको छ। कात्तिक २१ गतेदेखि २८ गतेसम्म बागलुङ नगरपालिका-४, निरयघाटमा महायज्ञ हुने कार्यक्रम तय गरिएको छ।
महायज्ञ सुरु नहुँदै सहयोग जुट्ने क्रम सुरु भएको आश्रमले जनाएको छ। भवन निर्माणका लागि हाल अमेरिकामा रहेका रेनुका अधिकारी, इन्द्रमणि अधिकारी र मनु अधिकारीले संयुक्त रूपमा रु. ५० हजार ५ सय ९८ सहयोग गरेका छन्।
त्यस्तै, बागलुङ नगरपालिकाका प्रमुख बसन्तकुमार श्रेष्ठले आश्रम भवनको निर्माणका लागि आर्थिक, भौतिक र नैतिक रूपमा सहयोग गर्ने प्रतिबद्धता जनाउँदै आफ्नो एक महिनाको तलब सहयोग गर्ने घोषणा गर्नुभएको छ। नगर उप–प्रमुख राजु खड्काले रु. १ लाख १ सय ११, वडा नं. ८ का अध्यक्ष छमबहादुर कार्कीले एक महिनाको तलब, र अन्य कार्यपालिका सदस्यहरूले १५ दिनको भत्ता सहयोगस्वरूप दिने घोषणा गरेका छन्।
गलकोट नगरपालिका–१० का समाजसेवी मानसिंह छन्त्यालले पनि भवन निर्माणका लागि रु. १ लाख ५ हजार ५ सय ५५ सहयोग गर्नुभएको मानव सेवा आश्रमकी अभिभावक सुमिरा लामाले जानकारी दिनुभयो ।
हाल बागलुङ नगरपालिका–३ लालीगुराँसचोकस्थित आश्रममा ३५ महिला र २९ पुरुष गरी ६४ जना सहयोगापेक्षी आश्रित छन् । निरयघाटमा निर्माणाधीन भवन चैत्र मसान्तभित्र सम्पन्न गर्ने लक्ष्य राखिएको छ । महायज्ञमा भागवत् भाष्कर कमलनयन गौतमले कथा वाचन गर्ने कार्यक्रम तय भएको छ ।
महायज्ञलाई सफल बनाउन बागलुङ नगरपालिका–२ मा सचिवालय स्थापना गरी प्रचार–प्रसार, जनसम्पर्क, सदस्यता वितरण र सहयोग संकलनका गतिविधि तीव्र पारिएको छ । साथै, आश्रमले बागलुङ, पर्वत र म्याग्दी जिल्लामा स्नेहमिलन कार्यक्रमसमेत सम्पन्न गरिसकेको छ ।
मूल समारोह समितिका महासचिव युक्तप्रसाद सुवेदीका अनुसार सचिवालयले तयारीलाई व्यवस्थित र प्रभावकारी बनाउन निरन्तर काम गरिरहेको छ ।
दुई सय जना सहयोगापेक्षीलाई सेवा दिन सक्ने भवन निर्माण र अक्षयकोष वृद्धि गर्ने उद्देश्यले महायज्ञ आयोजना गरिएको हो । हालसम्म भवन निर्माणमा ५ करोड रुपैयाँ खर्च भइसकेको र पूर्ण निर्माणका लागि अझै ४ करोड रुपैयाँ आवश्यक रहेको निर्माण उपभोक्ता समितिले जनाएको छ ।
महायज्ञमार्फत आवश्यक रकम संकलन गरी भवन निर्माण र दीर्घकालीन व्यवस्थापनका लागि कोष सुदृढ बनाउने लक्ष्य राखिएको छ ।
|
ओझेलका खबरलाई फेसबुक, एक्स, इन्स्टाग्राम वा टिकटकमा फ्लो गर्नुहोस्। कार्यक्रम ओझेलका खबर र ओझेलका खबर डटकम विशेष रिपोर्टहरु हेर्न Ojhelka Khabar TV युट्युब च्यानल सब्स्क्राइब गर्नुहोस्। |
