दुई फरार प्रतिवादी कारागार चलान

बागलुङ: बैंकिङ र पशुपंक्षीसम्बन्धी फरार रहेका दुई जना प्रतिवादीलाई बागलुङ प्रहरीले पक्राउ गरी सार्वजनिक गरेको छ।

पक्राउ पर्नेमा गलकोट नगरपालिका–१ दुधिलाभाटीका ६० वर्षीय जंगबहादुर पुन र २० वर्षीय सुदिप नेपाली रहेका छन्।

जिल्ला प्रहरी कार्यालय बागलुङका सूचना अधिकारी तथा प्रहरी नायब उपरीक्षक बसन्त पाण्डेका अनुसार, पुनलाई उच्च अदालत पाटनको फैसलाअनुसार बैंकिङ कसुर मुद्दामा सैतीस लाख रुपैयाँ जरिवाना र छ दिन कैद सजाय तोकिएको थियो।

त्यस्तै, नेपालीलाई जिल्ला अदालत बागलुङले मिति २०८१ असार ५ गते फैसला गरेको पशुपंक्षी विरुद्धको कसुरमा दुई महिना सात दिन कैद सजाय सुनाइएको थियो।

दुवै जना फरार अवस्थामा लुकेर बसेको सूचनाको आधारमा गलकोट प्रहरीले उनीहरूलाई पक्राउ गरेको जनाएको छ। फैसला कार्यान्वयनका लागि दुबैलाई बागलुङ जिल्ला कारागार चलान गरिएको प्रहरीले जनाएको छ।