गलकोटमा क्षयरोग मुक्त अभियानलाई सफल पार्न युवा परिचालन समिति गठन 

गलकोट: क्षयरोग मुक्त गलकोट अभियानलाई सफल पार्नको लागि युवा परिचालन समिति गठन तथा अभिमुखीकरण कार्यक्रम सम्पन्न भएको छ।

गलकोट नगरपालिकामा ‘क्षयरोग मुक्त गलकोट अभियान’ लाई प्रभावकारी रुपमा कार्यान्वयन गर्न युवा परिचालन समिति गठन तथा अभिमुखीकरण कार्यक्रम सम्पन्न भएको हो।

गलकोट नगरपालिकाका ११ वटै वडालाई प्रतिनिधित्व गर्ने युवाहरुको सक्रिय सहभागितामा सम्पन्न भएको कार्यक्रममा युवाहरुलाई क्षयरोग सम्बन्धी ज्ञान अभिवृद्धि गर्दै सामाजिक जागरुकताको संवाहकका रुपमा तयार पार्न महत्वपूर्ण छलफलहरु गरिएको थियो।

कार्यक्रममा गलकोट नगरपालिकाका जनस्वास्थ्य अधिकृत तथा स्वास्थ्य शाखा प्रमुख सुशिल पौडेल र जनस्वास्थ्य अधिकृत पारस पंगेनीले सहजिकरण गर्नुभएको थियो।

युवाहरु परिवर्तनका संवाहकका रुपमा स्थापित भईरहेकाले उनिहरुको सक्रिय संलग्नताले अभियानलाई गतिशिलता प्रदान गर्ने उद्देश्यले युवा परिचालन समिति गठन गरिएको हो।

अमृत सापकोटाको अध्यक्षतामा १५ सदस्यिय युवा परिचालन समिति गठन गरिएको छ। समितिको उपाध्यक्षमा स्मृती खत्री, सचिवमा विवेक गैरे, सहसचिवमा किरण सुनार, कोषाध्यक्षमा कमला थापा रहनुभएको छ । त्यस्तै सदस्यहरुमा स्मारीकम श्रीस, तारा विक, करुणा गौतम, सिम्रन दर्जी, लोचन स्वर्णीम शर्मा, अनुप नेपाली, निर्मल थापा, अञ्जु घर्ती, अनुसन्धानीका श्रेष्ठ, आशिष विक रहनुभएको थियो।

उक्त समितिले नगर क्षेत्रमा क्षयरोगबारे जनचेतना अभिवृद्धि गर्ने कार्यक्रमहरुको आयोजना गर्ने, शंकास्पद बिरामीहरुको पहिचानमा सहयोग, स्वास्थ्य परीक्षणका लागि प्रोत्साहन भूमिका निर्वाह गर्ने जनाईएको छ।

कार्यक्रम गलकोट नगरपालिकाका अस्पताल नर्सिङ निरीक्षक रिमा बोसेलले सञ्चालन गर्नुभएको थियो।