घर आगलागी हुँदा जाजरकोटमा बालकको मृत्यु

जाजरकोट, फागुन २६: गएराती जाजरकोटका एक परिवारको घरमा आगोलागी हुँदा त्यस परिवारका १२ बर्षीय बालकको जलेर मृत्यु भएको छ। जिल्लाको कुशे गाउँपालिका ग्राक्लीका जनक रोकायाको घरमा आगोेलागी हुँदा उनका १२ बर्षीय छोरा अम्मर रोकायको जलेर मृत्यु भएको हो।

जिल्ला प्रहरी कार्यालय जाजरकोटले पठाएको विवरण अनुसार गएराती करिब १२ बजेको समयमा रोकायको खरले छाएको घर चुलोमा बालेको आगो एक्कासी सल्किन गई घर जलेको र सुतिरहेका बालक अम्मरको घटनास्थल मै मृत्यु भएको सुचना पाउन साथ प्रहरी चौक पेंंकबाट प्रहरी सहायक निरीक्षक कालिराम थारुको कमाण्डमा तिन घण्टाको पैदल यात्रा गरी घटना स्थलमा विहानपख पुगेको थियो।

प्रहरीले मृतक बालको पोष्टमार्टम गर्न अस्पताल पुर्याउनुका साथै एक लाख २५ हजार क्षति भएकोर बिहान सवा ४ बजे तिर आगो पुर्ण रुपमा नियन्त्रणमा लिई थप अनुसन्धानका लागि जिल्ला प्रहरी कार्यालय जाजरकोटमा मुचुल्का लगायतको विवरण बिहान ६ बजे पुर्याएको थियो। घटनास्थल जिल्ला प्रहरी कार्यालय जाजरकोटबाट ४८ किलोमिटर उत्तरमा पर्ने प्रहरीले जनाएको छ।