मुसिकोट-३, तोलादीमा आज राष्ट्रिय परिचयपत्र वितरण

मुसिकोट: गुल्मीको मुसिकोट नगरपालिका भित्रका सबै वडाहरुमा राष्ट्रिय परिचय पत्र वितरण गरिए संगै आज मुसिकोट नगरपालिका वडा नं. ३ को वडा कार्यालयले टोल विभाजन गरी तोलादी टोलका सेवाग्राहीहरुलाई राष्ट्रिय परिचय पत्र वितरण गरिएको वडा नं. ३ का वडा अध्यक्ष शंकर बहादुर रायमाझीले बताउनु भयो।

बिहान १० बजे देखि साँझ ५ बजे सम्म राष्ट्रिय परिचयपत्र वितरण गरिएको हो। राष्ट्रिय परिचय पत्र वितरण गर्ने क्रममा भोलि देखि ३ नं. वडाका अन्य टोलहरु पेंगा, खिल्ली, भराह लगायतका टोलका सेवाग्राहीलाई वितरण गर्ने पनि वडाध्यक्ष रायमाझीले बताउनु भयो।

राष्ट्रिय परिचयपत्रको लागि एक करोड ३९ लाख ४० हजारभन्दा बढी नागरिकले आफ्नो विवरण दर्ता गराएका छन्। तर जम्मा तीन लाख ३४ हजार तीन सय ७५ जना नेपालीको हातमा परिचयपत्र कार्ड परेको छ।

राष्ट्रिय परिचयपत्र तथा पञ्जीकरण विभागका अनुसार गत साताको अन्तिमसम्ममा विभागले २६ लाख ७६ हजार छ सय ७६ वटा कार्ड छापिसकेको छ। वितरणको लागि १७ लाख ३७ हजार आठ सय ९६ वटा कार्ड विभिन्न जिल्ला प्रशासन कार्यालयहरूमा पठाएको छ।