गुल्मी: साना किसान कृषि सहकारी संस्था लिमिटेड, मुसिकोट नगरपालिका-३, बडागाउँ, गुल्मीको १९ औँ वार्षिक साधारणसभा तथा ७ औँ अधिवेशन सौहार्दपूर्ण तरिकाले गत शनिवार सम्पन्न भएको छ।
हरि प्रसाद छन्तेलको अध्यक्षता, मुसिकोट नगरपालिका प्रमुख जिवलाल खरेल जीवनको प्रमुख आतिथ्यतामा सम्पन्न अधिवेशनमा विशिष्ट अतिथिहरु उपमेयर गंगा श्रेष्ठ, जि. स. स. सदस्य सावित्रा भन्डारी पाण्डे, PMAMP प्रमुख गंगा कुमारी पोखरेल, VHALSEC प्रमुख हुमकान्त पाण्डेय, ज्ञान केन्द्र बाग्वानी अधिकृत जीवन ज्ञवाली, अतिथिहरु वडा अध्यक्षहरू रविन्द्र के. सि., शंखर बहादुर रायमाझी, जुक्त बहादुर छन्तेल, कार्यलालिका सदस्य माया अधिकारी कार्की लगाएत पूर्व संचालक र पूर्व लेखा सदस्यहरु, विभिन्न संघ संस्थाका प्रतिनिधि, सुरक्षाकर्मी, पत्रकार र ८२३ जना सदस्यहरुको उपस्थितिमा केहि महत्वपूर्ण निर्णय समेत गरिएको छ।
२७ जना पूर्व संचालक, ४ जना पूर्व लेखा सदस्य, उत्कृष्ट समुह १६३, असल ऋणी फूल कुमारी माझी, उत्कृष्ट पशुपालक देविदत्त घिमिरे, उत्कृष्ट कृषक विष्णु कार्कीलाई नगद रु १०००-२०००, सम्मान पत्र र मायाको चिनो साथै ४ जना ज्येष्ठ शेयर सदस्यलाई जनहि नगद रु १५००० सहित सम्मान पत्र र मायाको चिनोले सम्मान गरिएको छ।
साधारण सभाले यो वर्ष देखि गौरवको योजना अन्तर्गत कफि विस्तार कार्यक्रम, संस्था मर्जर, मकैको आटो ब्राण्डिङ, ७० वर्ष उमेर पुगिसकेका ज्येष्ठ शेयर सदस्य तिर्थ व्रत कार्यक्रम, १३ जना ऋणीको नाम कालो सूचिमा प्रकाशन गर्ने लगायतका केहि महत्वपूर्ण निर्णय सहित हरि प्रसाद छन्तेल अध्यक्ष र चुरा बहादुर पछाई उपाध्यक्ष रहने गरि ११ सदस्यीय संचालक समिति गठन समेत गरेको छ।
नवगठित समितिलाई निर्वाचन मंडलका संयोजक अधिवक्ता अनन्तलाल भन्डारीले पदभार तथा सपथ ग्रहण गराउनुको साथै निर्वाचित प्रमाणपत्र हस्तान्तरण गर्नुभएको थियो।
१९ औँ वार्षिक साधारण सभा तथा ७ औँ अधिवेशन-२०८१ को जारी प्रतिवेदनमा पशुपालन व्यवसाय, कृषि उत्पादन र स्वरोजगार जस्ता कार्यक्रमलाई मुख्य प्राथमिकतामा राखी उत्पादनमा आधारित अनुदान कार्यक्रमलाई थप व्यवस्थित बनाउन दुध र मासु उत्पादनलाई अभिलेख राख्ने व्यवस्था मिलाईनेछ भने सदस्यहरुलाई सम्बन्धित निकायहरुसंग सहकार्य गरी कार्यक्रममा सहभागी गराईने बताइएको छ।
यसैगरी उत्पादनमा आधारित अनुदान कार्यक्रमलाई प्रभावकारी बनाउन गत आ.व. को दशैँ देखि सहकारीको समन्वयमा एकाद्वार प्रणाली मार्फत खसी बोका बिक्री गर्ने कार्यक्रम तय गरिएको तर न्यून संख्यामा मात्र सदस्यहरु आवद्ध भएकाले चालु आ.व. देखि प्रत्येक सदस्यहरु उक्त कार्यक्रममा सहभागी हुनका लागि पनि अनुरोध गरिएको छ। यस साधारणसभा देखि लागु हुने गरी कृषि तथा पशुपालनको क्षेत्रमा दिईने सम्मान कार्यक्रमलाई केहि परिवर्तन गर्दै अब उप्रान्त उत्पादनमा आधारित र बिमा कार्यक्रममा सहभागी सदस्यहरुलाई मात्र सम्मान गरिने बताइएको छ। चालु आ.व. बाट स्थानीय र स्वदेशी मकैको आटोलाई साना किसानको पहिचानको रुपमा ब्राण्डिङ बनाई नेपालका मुख्य सहरहरुमा पुर्याउने बताइएको छ।
प्रतिवेदनमा थप कार्यक्रम संचालन गर्न र सफल बनाउन सदस्यहरुलाई प्रोत्साहित गरिने पनि बताइएको छ। कृषि क्याम्पको अवधारणा सहित जग्गा भाडामा लिई सामूहिक खेती प्रणाली मार्फत बीउ उत्पादन, कफि खेती आदिबाट प्रत्यक्ष रोजगारी सिर्जना गर्दै कफी उधोगको स्थापना र संचालनबाट सदस्यहरुको आर्थिक र सामाजिक जीवनस्तर सुधार हुने अपेक्षा राखिएको छ।
दिनानुदिन भईरहेको बसाईसराई रोक्न, विदेश पलायन हुने युवा जनशक्ति रोक्न, बाझो रहेको खेतीयोग्य जमिनलाई प्रयोग गर्न, खेतीमा जंगली जनावरले गरेको नोक्सानलाई न्यूनिकरण गर्न कफि खेतीलाई व्यक्तिगत, सामुहिक र संस्थागत रुपमा विस्तार गर्ने कार्यक्रमलाई प्राथमिकता दिईनेछ।
यसका अतिरिक्त सदस्यहरुले उत्पादन गरेका कफिको संकलन, भण्डारण, पल्पिङ, होलिङ र ग्रेडिङ समेत गरी बजारीकरण पनि यहिबाट गर्ने गरी व्यवस्थापन मिलाईनेछ। सदस्य किसानहरुले उत्पादन गरेका कृषि जन्य वस्तुको बजार र मूल्य सुनिश्चितताको लागी नगरपालिकासंग सहकार्य गरिने पनि उल्लेख छ। विभिन्न उप-समितिहरुलाई आफ्नो काम र जिम्मेवारी प्रति पूर्ण उत्तरदायी बनाईने साथै आ-आफ्नो जिम्मेवारी कुशलतापूर्वक सम्पादन गर्नका लागी प्रोत्साहित गरिने प्रतिवद्धता पनि उल्लेख छ।
आ.व. ०७९/०८० को अन्त्यमा १२९४ जना शेयर सदस्य रहेकोमा आ.व. ०८०/०८१ को अन्त्यमा ३६ जना सदस्य थप भई १३३० जना शेयर सदस्य रहेको अधिवेशनमा जानकारी गराइयो। यसैगरी आ.व. ०७९/०८० को अन्त्यमा रु. ८५,७०,१०० रहेको शेयर पुंजी आ.व. ०८०/०८१ को अन्त्यमा आईपुग्दा रु. २,६३,४०० ले वृद्धि भई रु. ८८,३३,५०० मात्र रहेको छ।
कुनै पनि वित्तीय संस्थाको आन्तरिक श्रोतको प्रमुख अंग भनेको निक्षेप/बचत रहेको बताउँदै निक्षेप अन्तरगत सदस्यहरुवाट संकलित सबै बचतलाई लिईने जानकारी गराइयो। अघिल्लो आ.व. मा देखिएको तरलता अभावलाई ब्याजदर, बचतको सुरक्षण आदि कुराहरुमा सुधार गर्दै आ.व. ०७९/०८० को अन्त्यमा रु. १०,५५,८०,५७८ बचत रहेकोमा आ.व. ०८०/०८१ को अन्त्यमा आईपुग्दा रु. १,४३,९२,१९५ ले वृद्धि भई रु. ११,९९,७२,७७३ रहेको जानकारी गराइयो।
ऋण लगानी तथा असुली तर्फ वाणिज्य, विकास बैंक र अन्य वित्तीय संस्थाहरुको खुल्ला लगानी रणनिती, प्रतिस्पर्धात्मक व्याजदर आदि कारणहरुले ऋण लगानीमा नकारात्मक प्रभाव पार्दै आ.व. ०७९/०८० को अन्त्यमा रु. १३,६६,१०,८४०/- मात्र लगानी रहेकोमा आ.व. ०८०/०८१ को साउन-आषाढसम्म रु. ७,१६,६८,०००/- लगानी गरी सोही अवधिमा रु. ७,३१,०८,८२७/ असुल गरी रु. १४,४०,८२७/- ले लगानीमा हास भई आ.व. को अन्त्यमा रु. १३,५१,७०,०१३/ तेह करोड एकाउन्न लाख सत्तरी हजार तेह रुपैया लगानी पुऱ्याउन सफल भएको सभालाई जानकारी गराइयो।
आ.व. ०८०/०८१ मा पनि गत वर्ष भन्दा नाफामा वृद्धि भएको छ। आ.व. ०८०/०८१ मा रु. २,१६,२८,१३६/८५ आम्दानी गरी सोही अवधिमा रु. १,४३,२५,३९०/५३ खर्च कटाई आयकर अघि रु. ७३,०२,७४६/३२ नाफा कमाउन सफल भएको कुरा सभालाई जानकारी गराइयो।
संस्थाको आन्तरिक श्रोतमा भएको वृद्धि, ऋण मागमा कमी आदि कारणहरुले गर्दा साना किसान विकास लघुवित्त वित्तीय संस्था लि., शाखा कार्यालय बुटवलबाट लिने थोक कर्जा आ.व. ०८०/०८१ मा रु. ४६,००,००० ले घटाई रु. ६८,५०,००० तिर्न बाँकी ऋण रहेको पनि जानकारी गराइयो।
यसैगरी संस्थाको कार्यक्षेत्र मुसिकोट न.पा. २, ३ र ४ भित्रका सदस्यहरुलाई विगतका वर्षहरुमा कृषि सामाग्री कम्पनीबाट प्राप्त रासायनिक मलले अपुग भएको कारण साल्ट ट्रेडिङ्ग कर्पोरेशनको पनि विक्रि अनुमति प्राप्त गरि सहज रुपमा मल उपलब्ध गराउने तर्फ विशेष ध्यान दिइएको छ। नगरपालिकाले बनाएको निति भित्र रहेर गत आ.व. मा साल्ट ट्रेडिङ्ग कार्पोरेशन र कृषि सामाग्री कम्पनी भैरहवाबाट रासायनिक मल (युरिया ४८.६ मेट्रिक टन, डि.ए.पि. ७ मेट्रिक टन, पोटास २ मेट्रिक टन र कृषि चुन १ मेट्रिक टन) ५८.६ मेट्रिक टन. परिमाणमा बिक्रि वितरण गरिएको छ।
|
ओझेलका खबरलाई फेसबुक, एक्स, इन्स्टाग्राम वा टिकटकमा फ्लो गर्नुहोस्। कार्यक्रम ओझेलका खबर र ओझेलका खबर डटकम विशेष रिपोर्टहरु हेर्न Ojhelka Khabar TV युट्युब च्यानल सब्स्क्राइब गर्नुहोस्। |
