बागलुङ बडिगाडको आफ्नै घरमा दम्पती मृत फेला

बागलुङ: बागलुङको बडिगाडमा श्रीमान् श्रीमती मृत फेला परेका छन्। जिल्लाको बडिगाड गाउँपालिका-१० निगलपानीका २२ वर्षीय जीवन परियार र उनकी श्रीमती १९ वर्षीया सन्ध्या परियार आफ्नै घरमा मृत फेला परेका हुन्।

बिहीबार साँझसँगै खाना खाएर सुतेका दम्पतीको मृत्युले सिङ्गो गाउँ नै शोकमा परेको छ । गाउँलेले प्रहरीलाई खबर गरेपछि शव उठाएर बुर्तिबाङ प्राथमिक स्वास्थ्य केन्द्रमा परीक्षणका लागि पठाइएको जिल्ला प्रहरी कार्यालय बागलुङका प्रहरी निरीक्षक केशव थापाले जानकारी दिए ।

दुई वर्ष अगाडि विवाह गरेको परियार दम्पतीको एउटा छोरी छिन् । अहिलेसम्म के भएर मृत्यु भएको पत्ता नलागेकोले अनुसन्धान जारी रहेको प्रहरी निरीक्षक थापाले बताए ।

उनले भने, ‘श्रीमान् पोखरामा काम गर्नुहुँदो रैछ, केही दिन अगाडि आउनुभएको रहेछ, साँझ घरमा सँगै खाना खानुभएको रहेछ, केही खाना बाँकी रहेको देखियो, घटना कसरी भयो, अहिलेसम्म पत्ता लागेको छैन, हामीहरुले अनुसन्धान गरिरहेका छौँ।’