मृगौला पीडित होम बहादुर रानालाई चेक रिपब्लिकमा रहेका नेपालीहरुबाट एक लाख सहयोग

गुल्मी: दुवै मृगौला फेल भई उपचाररत मुसिकोट नगरपालिका-३, तोलादीका होम बहादुर रानाको आर्थिक अवस्था नाजुक रहेकोले सहयोग संकलन अभियान सञ्चालन गरिएको थियो। यसै क्रममा चेक रिपब्लिकमा ‌रहनुहुने ऋषिराम गिरीको अगुवाईमा संकलित रकम रु. १,०१८३४/- (एक लाख एक हजार आठ सय चौतिस) बिरामी होम बहादुर रानाको बैंक खातामा पठाइएको छ।

चेक रिपब्लिकमा रहेका नेपालीहरुबाट संकलित उक्त रकम हिजो बिरामीको नाममा रहेको बैंक खातामा पठाइएको अभियानको अगुवाइ गरिरहनुभएका ऋषिराम गिरीले बताउनु भयो। उहाँले यस अभियानमा हातेमालो गर्दै सहयोग रकम उपलब्ध गराउनु हुने सम्पूर्ण मनकारी महानुभावहरु प्रति हार्दिक आभार पनि व्यक्त गर्नुभएको छ।

लामो समयदेखि बुटवल स्थित छापाखानामा काम गर्दै आईरहेका रानाको स्वास्थ्यमा समस्या देखिएपछि चेकजाँच गराउदा दुवै मृगौलाले काम गर्न छाडेको र छिट्टै प्रत्यारोपण गर्नुपर्ने बताइएको थियो। उनी एक्लो सन्तान हुन। परिवारले उपचार खर्च जुटाउने कुरा त परै जाओस् हातमुख जोर्नै धौ-धौ रहेको छ। त्यसैले उनको जीवन रक्षार्थ सबै संग सहयोगको याचना गर्नुपरेको तोलादी कल्याणकारी समाजमा सदस्य सालिक खत्रीले बताउनुभयो।

चेक रिपब्लिकमा रहेका नेपालीहरुबाट संकलित १८,१०० चेक कोरुना पठाएको दिनको विनिमय दर अनुसार रु. एक लाख एक हजार आठ सय चौँतिस (ट्रान्सफर चार्ज कटाएर) बिरामीको नाममा रहेको बैंक खातामा पठाइएको छ।