चेक रिपब्लिकका नेपालीबाट इस्माका अग्नी पीडितलाई राहत वितरण

गुल्मी, जेठ ३: गुल्मीको इस्मा गाउँपालिकाका अग्नी पीडितहरुलाई चेक रिपब्लिकमा रहेका नेपालीहरुको संस्थाले बिहिबार जस्तापाता सहयोग हस्तान्तरण गरेको छ।

चेक रिपब्लिक स्थित गैर आवासीय नेपाली संघ एनआरएनएले इस्मा गाउँपालिका-२, सिदुङ्खाका अग्नि पीडितहरुलाई दश बण्डल अर्थात ९० वटा जस्तापाता वडा नम्बर ४ कोटकोटेरीका अग्निी पीडितलाई १४ बण्डल अर्थात १२६ थान जस्तापाता सहयोग हस्तान्तरण गरेको हो ।

चेक रिपब्लिक स्थित गैर आवासीय नेपाली संघका अध्यक्ष गुल्मी मुसिकोट नगरपालिका ७ का बासिन्दा बैकुण्ठ रायमाझी र इस्मा गाउँपालिका ४ ढोकामुख घर भएका संघका उपाध्यक्ष दुर्गा अर्यालको अगुवाईमा त्यहाँ रहेका नेपालीहरुबाट सहयोग संकलन गरी उक्त राहत सामग्री हस्तान्तरण गरिएको हो ।

संघका नेपाल स्थित प्रतिनिधि मुसिकोट नगरपालिका ७ का पूर्व वडाअध्यक्ष प्रकाश काफ्ले, नेकपा एमालेका जिल्ला कमिटि सदस्य तथा इस्मा गाउँपालिका पूर्व अध्यक्ष लक्ष्मण विष्ट र एमालेकै जिल्ला कमिटि सदस्य राजेन्द्रविक्रम कुँवरको सयोजनमा उक्त राहत सामग्री हस्तान्तरण गरिएको हो ।

सहयोगी संस्था र त्यहाँ स्थित नेपालीहरुलाई वडा नँबर २ का वडाअध्यक्ष लोकनाथ आचार्य, ४ का वडाअध्यक्ष मान बहादुर बस्नेतले धन्यवाद दिएका थिए । उनीहरुले भने ‘हालसम्म खाद्यान्न लत्ताकपडा राहत प्राप्त भएको थियो । सबै भन्दा ठुलो अभाव अग्नि पीडितहरुका पशुचौपायहरु खुला आकाशमुनि बस्न परिरहेको बेला चेक रिपल्बिकमा रहेको उक्त संस्था र नेपालीहरुले पशु चौपायको पशुबाक्य बुझेझैं गरी गोठ निर्माणका लागि जस्तापाता उपलब्ध गराएकोप्रति हामी आभार प्रकट गर्दछौं ।’

त्यस्तै इस्मा गाउँपालिका पूर्व अध्यक्ष विष्टले क्षेत्र नम्बर २ का सांसद गोकणर् विष्टले घटनाको दोश्रो दिन प्रारम्भिक राहतका रुपमा खाद्यान्न, भाडाकुँडा, लत्ताकपडा, हस्तान्तरण गरेको, त्यति नै बेला उहाँले सरकारले घर बनाइदिने उद्घोष गरेअनुरुप रु। चार लाख रुपियाँ संघ र प्रदेश सरकारबाट प्रदान हुने भएको थप एक लाख इस्मा गाउँपालिका सहित पाँच लाखमा अग्नि पीडितका घरहरु निर्माण हुन सुरु गरेको र सरकारले गोठ क्षति भएकालाई कुनै पनि सहयोग नगर्ने नीति अनुसार चेक रिपब्लिकमा रहेका साथीहरुसँग समन्वय गरी गोठ निर्माणका लागि जस्तापाता मगाउन समन्वय गरिएको बताएका थिए ।

त्यस्तै एमाले नेता कुँवरले त्यहाँबाट इस्माका अग्नि पीडितहरुलाई त्यहाँबाट आवश्यकता माग गरिएको र आफुहरुले गोठ निर्माणका लागि जस्तापाता अति आवश्यक भएको बताएपछि पठाइएको बताएका थिए ।

नेपाल स्थित संघका प्रतिनिधि मुसिकोट ७ का पूर्व वडाअध्यक्ष काफ्लेले छिमेकी पालिका इस्मामा घरगोठ जल्दा आफूहरुको पनि मन जलेको र विदेशमा रहेका साथीहरुसँग सहयोगको अपिल गरेअनुरुप उक्त राहत सामग्रीका लागि उहाँहरुले रकम पठाई आफुहरुले बुटवलबाट खरिद गरी हस्तान्तरण गर्न आएको सुनाएका थिए ।

चेक रिपब्लिक स्थित एनआरएनएका अध्यक्ष रायमाझी र उपाध्यक्ष अर्यालले पीडितहरुको घाउमा थोरै भए पनि मलम लगाउन सकियोस् र विपद् पर्दा एक नेपालीले अर्को नेपालीप्रति देखाउँदै आएको सहानुभूतिलाई निरन्तरता दिने प्रयास गरेको बताएका छन ।

यतिबेला इस्मा गाउँपालिकाले प्रत्येक अग्नि पीडितहरुको घर बनाउन सुरु गरेको छ । बर्खा भित्रिए पनि मौसमले साथ दिएसम्म छिटै घर निर्माण गरिसक्ने आफुहरुको लक्ष्य रहेको इस्मा गाउँपालिका अध्यक्ष भगतसिंह खड्काले बताउँदै आएका छन ।