सरोज सरको ‘उज्यालो यात्रा’ उपन्यास लोकार्पण

गुल्मी: गुल्मीको मुसिकोट नगरपालिका वडा नं- ७ वामीटक्सार निवासी लेखक एवम् शिक्षक सरोजराज बौद्धाचार्यको सामाजिक उपन्यास “उज्यालो यात्रा” को लोकार्पण गरिएको छ ।

महेन्द्र आदर्श नमुना माध्यमिक विद्यालयका शिक्षक समेत रहनुभएका बौद्धाचार्यद्धारा लिखित कृति विद्यालयमै विद्यार्थी तथा सरोकारवालाहरुको बीचमा लोकार्पण गरिएको हो ।

पुस्तक लोकार्पण गर्दै मुसिकोट नगरपालिकाका नगरप्रमुुख जीवलाल खरेल जीवनले विद्यार्थीहरुकाबीचमा पुस्तक विमोचन गर्दा उनीहरुलाई पनि लेख्ने प्रेरणा मिल्ने बताउनुभयो । उहाँले लेख्नेहरु धेरै भएपनि पुस्तक नै लेख्ने कार्य जटिल रहेको भन्दै लेखक बौद्धाचार्यलाई शुभकामना व्यक्त गर्नुभयो ।

त्यस्तै विद्यालयका प्रधानाध्यापक देविराम शर्माले कृतिहरु रचना गरेर समाजलाई पथप्रदर्शन गर्ने कार्य चुनौतीपूर्ण रहेको भन्दै आफ्नो विद्यालयका शिक्षकको यो उत्साहपूर्ण कार्यले विद्यालय निकै खुसी भएको बताउनुभयो । उहाँले दैनिक पठनपाठन समयका अतिरिक्त समयमा पुस्तक लेखेर सरोज सर अरुका लागि समेत प्रेरणा बनेको बताउनुभयो ।

उपन्यासले सामाजिक कथा वस्तु र सामाजिक परिघटनाको चित्रण गरेको लेखक सरोज बौद्धाचार्यले जानकारी दिनुभयो । पुस्तक लोकार्पण कार्यक्रममा मुसिकोट नगरपालिकाका नगरप्रमुख जीवन खरेल, शिक्षा अधिकृत प्रकाश नेपाली, विद्यालय व्यवस्थापन समिति अध्यक्ष सन्तोष शाक्य, प्रधानाध्यापक, देविराम, हाम्रो पुस्तकालय वामीका अध्यक्ष रामचन्द्र श्रेष्ठ, सहायक प्रधानाध्यापक धनपती खरेल र अनन्तलाल भण्डारी लगायत पत्रकार तथा शिक्षक विद्यार्थीहरुको उपस्थिति रहेको थियो ।

लेखक सरोजराज बौद्धाचार्य २०४८ सालदेखि शिक्षण पेशामा आबद्ध हुनुहुन्छ । नेपाली विषयमा एम.एड गर्नुभएका उहाँले हाल महेन्द्र आदर्श नमुना माध्यमिक विद्यालयसंगै रुद्रावची बुहुमखी क्याम्पसमा उपप्रध्यापक रही शिक्षण गर्दै आउनुभएको छ । उहाँ विभिन्न सामाजिक संघ संस्थामा क्रियाशिल रहनुभएको छ भने विभिन्न साहित्यिक लेखनमा पनि अग्रसर हुनुहुन्छ।