राष्ट्रपति रनिङ शिल्ड जितेको खुसीयालीमा मुसिकोटमा विजय उत्सव

गुल्मी: जिल्ला स्तरीय राष्ट्रपति रनिङ शिल्ड प्रतियोगीतामा लगातार ३ पटक विजयी भई रनिङ शील्ड जितेको खुसीयालीमा मुसिकोट नगरपालिकाले विजय उत्सव मनाएको छ ।

आईतबार प्रतियोगीतामा सहभागी खेलाडीहरु सहित जनप्रतिनिधि र स्थानीयको सहभागीतामा विजय उत्सव मनाएको हो । विजयी र्यालीमा उपाधी चुमेका रनिङ शील्ड र कप सहित बजारमा बाजा गाजा सहित र्याली गरिएको थियो ।

गुल्मी तम्घासको चिदिचौर खेल मैदानमा संचालन भएको जिल्ला स्तरिय १४ औ राष्ट्रपति रनिङ्ग शिल्ड प्रतियोगीतामा मुसिकोट नगरपालिकाले लगातार तीन बर्ष विजय प्राप्त गरेको हो । मुसिकोटले १७ स्वणर्, २० रजत र २३ कास्य गरेर ६० पदकसहित प्रथम भएको हो ।

प्रतियोगीतामा सहभागी खेलाडी र समन्वय गर्ने शिक्षकहरुलाई नगरपालिकाले सम्मान र पुरस्कृत समेत गरेको छ । विभिन्न खेलमा सहभागी भई पदक जित्ने खेलाडीहरुलाई सम्मान गरिएको हो ।

कार्यक्रमलाई सम्बोधन गर्दै मुसिकोट नगरपालिकाका नगरप्रमुख जीवन खरेलले नगरपालिकाको गरिमा उच्च हुने गरी प्रतियोगीतामा विजयी हासिल गर्ने सम्पूर्ण खेलाडीहरुलाई बधाई दिनुभयो । उहाँले नगरपालिकाले खेल क्षेत्रमा आवश्यकतानुसार बजेट विनियोजन गरी खेल क्षेत्रलाई प्राथमिकता दिएर अगाडी बढेको समेत बताउनुभएको थियो ।

विजयी उत्सव कार्यक्रममा नगरपालिकाका नगरउपप्रमुख गंगा श्रेष्ठ, प्रमुख प्रशाशकीय अधिकृत बिनोद कुँवर, वडाध्यक्षहरु, कार्यपालिका सदस्य लगायत खेलाडी, शिक्षक र कर्मचारीहरुको उपस्थिति रहेको थियो । कार्यक्रमको सञ्चालन नगरपालिकाका शिक्षा अधिकृत प्रकाश नेपालीले गर्नुभएको थियो।