खड्क निशान देवीलाई नयाँ मन्दिरमा प्रवेश गराईयो

सागर भण्डारी, गुल्मी: मुसिकोट नगरपालिका वडा नं ८ वामी मैदानमा अवस्थित खड्कदेवि निशान मन्दिर (वामी कोट) मा खड्क निशान देवीलाई नयाँ मन्दिरमा प्रवेश गराईएको छ ।

मन्दिरको नवनिर्मित भवनमा पुजाआजा सहित प्रवेश गराईएको हो । मन्दिरको नयाँ भवन निर्माणका लागि झण्डै २ वर्ष अगाडी खड्क निशान देवीलाई छेउमा एउटा झुपडी बनाएर राखिएको थियो । आज दिउँसो १२ ः४५ बजे नयाँ मन्दिरमा प्रवेश गराईएको खड्कदेवी निशान मन्दिर व्यवस्थापन समितिका अध्यक्ष भिमसेन केसीले जानकारी दिनुभयो ।

उक्त शक्तिपिठको विगत २ वर्ष अगाडी निर्माण थालिएको थियो । मन्दिर निर्माणका लागि लुम्बिनी प्रदेश सरकार र मुसिकोट नगरपालिकाको ५०/५० लाख रुपैयाँ बजेट विनियोजन गरेका थिए । भने ५९ लाख ५६ हजार ४ सय ६३ रुपैयाँमा ठेकेदार कम्पनीसंग सम्झौता भएको वडा नं ८ का पूर्व वडाध्यक्ष नारायण सापकोटाले जानकारी दिनुभयो ।

वि.स.१७८६ सालमा स्थापना भएको कोट मन्दिरको ३ पटकसम्म पुर्न : निर्माण गरिएको थियो । पछिल्लो पटक तामाको छानोले मन्दिर छाईएको छ । भने कलात्मक झ्याल ठोका र कलात्मक शैलीमा मन्दिर निर्माण गरिएको छ । निर्माण कम्पनीले समयमै काम नगर्ने र बजेट फ्रिज हुने जस्ता समस्याले समयमै काम सम्पन्न हुन नसकेको सापकोटाकाले बताउनुभयो ।

सम्झौता बमोजिम सम्पूणर् काम सकिएपनि मन्दिरको पेटी निर्माण लगायतका अन्य कामहरु बाँकी रहेको मन्दिर व्यवस्थापन समिति अध्यक्ष केसीले बताउनुभयो । डिपिआर अनुसार केही बाँकी रहेका कामहरुसगैं डिपिआरमा समेत छुटेका केही कामहरु समितिले पुरा गर्ने गरी काम अगाडी बढाईएको उहाँको भनाई छ ।

ठेकेदार कम्पनीले गरेको बाहेक ४ वटा पुजा कोठामा टायल लगाउने, ९ वटा झ्यालमा ग्रील राख्ने, मुल ढोकामा च्यानल गेट राख्ने, फोहोर पानीको व्यवस्थापन, वाईरिङ लगायतका कामहरु समिति मार्फत सम्पन्न भएको केसीले बताउनुभयो । जसका लागि मुसिकोट नगरपालिकाले १ लाख २० हजार रुपैयाँ बजेट उपलब्ध गराउने प्रतिबद्धता व्यक्त गरेको उहाँले बताउनुभयो ।

वामी कोटको अहिलेसम्म आफ्नै जग्गा नभएको अवस्थामा यसलाई व्यवस्थित गर्न र जग्गा प्राप्तिको कामलाई अगाडी बढाउन प्रतिष्ठानकै रुपमा विकास गर्ने आफुहरुको योजना रहेको र दर्ता प्रक्रियामा रहेको केसीले जानकारी दिनुभयो ।

मुसिकोट नगरपालिका वडा नं – ८ का वडाध्यक्ष रमेश विश्वकर्माले खड्कदेवी निशान सबैको आस्थाको धरोहर रहेकाले यसको विकास र अझै थप व्यवस्थापनका लागि आवश्यक पहल गरिने बताउनुभयो । भवन निर्माणसंगै मन्दिर परिषर साँघुरो भएकाले तलबाट जालि लगाएर फराकिलो बनाउनेसगैं, शौचालय निर्माण, खानेपानी लगायतका कामहरुलाई आगामी वर्ष प्रदेश या नगरपालिकासंग पहल गर्ने उहाँले प्रतिबद्धता समेत व्यक्त गर्नुभयो ।

वामी कोटमा वडादशैँको घटस्थापना देखि एकादशीसम्म पुजाआजा सहित मेला हुने गर्दछ । उक्त अवसरमा बली दिनेहरुको भीड समेत लाग्दछ । त्यस्तै चैत्राष्टमीमा समेत पुजाआजा र बली दिने गरिन्छ । पुजाआजा तथा भाकलका लागि मुसिकोट नगरपालिकासंगै छिमेकी पालिकाहरु चन्द्रकोट, बडिगाड गाउँपालिका र गलकोट नगरपालिकाबाट समेत श्रद्धालुहरु पुग्ने गर्दछन् । उक्त मन्दिरमा भाकल गर्यो भने मनोकमना पुरा हुन्छ भन्ने विश्वास रहेको छ ।

खड्क निशान कोट मन्दिर प्रवेश गर्ने चोकमा वामी सेवा समिति जापानका अध्यक्ष समेत रहनुभएका कृष्ण सापकोटाको परिवारले आफ्नो बाबुआमाको नाममा प्रवेशद्धार बनाईदिनुभएको थियो ।