एनआरएनए, चेक रिपब्लिकको अध्यक्षमा बैकुण्ठ रायमाझी

गुल्मी: अस्ति जुलाई १६ तारिकमा सम्पन्न एनआरएनए, चेक रिपब्लिकको निर्वाचनबाट अध्यक्षमा गुल्मीको मुसिकोट नगरपालिका, वामी घर भई चेक रिपब्लिकमा लामो समयदेखि व्यवसाय गर्दै आउनुभएका मौलिक लोकसंस्कृति प्रेमी बैकुण्ठ रायमाझी निर्वाचित हुनुभएको हो।

निर्वाचित भएपछि रायमाझीले यो चेक रिपब्लिकमा रहेका सम्पूर्ण नेपालीहरुको जित रहेको बताएका छन्। उनले आफूले इमान्दारीताका साथ गैर-आवासीय नेपालीहरुको हक हितको संरक्षण हेतु काम गर्ने प्रतिवद्धता व्यक्त गर्नुभएको छ। उहाँले यस अघि एनआरएनए, चेक रिपब्लिकको उपाध्यक्ष पदको जिम्मेवारी निर्वाह गरिसक्नुभएको थियो।

रोजगारी तथा व्यवसायको शिलशिलामा विदेशी भूमिमा रहेर पनि नेपाल र नेपाली मौलिक लोकसंस्कृतिको अगाध प्रेमले गर्दा नेपाली लोक गीत र बाजाको संरक्षणका लागि उहाँले थुप्रै कामहरु गर्दै आउनुभएको छ। सामाजिक कार्य संगै परोपकारी काममा पनि उहाँको उत्तिकै सक्रियता देखिन्छ। उहाँकै अग्रसरतामा वामीमा जन्मी देशका विभिन्न भाग र विदेशका विभिन्न मुलुकमा रहेका वामेलीलाई एकजुट गर्ने उद्देश्यले वामी-विश्व सम्पर्क मञ्चको स्थापना गरिएको छ।

लोपोन्मुख नेपाली कला र बाजाको संरक्षण र प्रवर्द्धन गर्ने उद्देश्यले हरेक दुई वर्षमा गुल्मी मै पहिलोपटक वामीमा नौमती महोत्सव तथा नौमती बाजा वादन प्रतियोगिताको आयोजना गरिदै आइएको छ।

उहाँले नेपाली मौलिक लोक बाजाहरू मादल, बाँसुरी आदि र नौमती बाजाहरु युरोपका विभिन्न मुलुकमा घन्काउँदै आउनुभएको छ। जसले नेपाली मौलिक संस्कृति र पहिचानको प्रचारप्रसारमा महत्वपूर्ण भूमिका निर्वाह गर्छ।

रायमाझीको गायन र लेखनमा पनि रुचि रहेको छ। उहाँले थुप्रै गीतमा स्वर दिनुभएको छ भने थुप्रै गीतहरु लेख्नुभएको छ। केही म्युजिक भिडियोमा उहाँको अभिनय पनि देख्न सकिन्छ।

यस अवसरमा ओझेलका खबर डटकमका सल्लाहकार बैकुण्ठ रायमाझीलाई हार्दिक बधाई एवं सफल कार्यकालको शुभकामना व्यक्त गर्दछौँ।