समाजसेवी लिल बहादुर थापाद्वारा गृह जिल्लाका विभिन्न ठाउँमा सहयोग

सागर भण्डारी, गुल्मी: देशका विभिन्न ठाउँमा रहेका असहाय, अशक्त र विपन्न नागरिकलाई व्यक्तिगत रुपमा थुप्रै सहयोग गर्दै आउनुभएका समाजसेवी लिल बहादुर थापाले गृह जिल्लाका विभिन्न ठाउँमा सहयोग गर्नुभएको छ।

बाँकेको खजुरा गाउँपालिका वडा नं ४ डि गाउँ स्थायी घर भई हाल अमेरीकामा रहनुहुने समाजसेवी थापाले प्यारालाईसिस रोगबाट ग्रसित डिगाउँकै एक असहाय र सोही ठाउँकै एक व्यक्तिको घर निर्माणका लागि जस्तापाता सहयोग गर्नुभएको हो ।

प्यारालाईसिस रोगबाट ग्रसित भई विगत ६ महिनादेखि विस्तारामा थलिएका जगदिस परियारको उपचारका लागि ३० हजार रुपैँया र विष्णु गुरुङको परिवारलाई घर निर्माणकालागि जस्तापाता किन्न ५० हजार रुपैयाँ सहयोग गर्नुभएको हो ।

उक्त सहयोग थापाको तर्फबाट दिदि देउमति थापा र भान्जा दान बहादुर गुरुङले पिडितको परिवारमै पुगेर हस्तान्तरण गर्नुभएको हो । सहयोग रकम हस्तान्तरण गर्दै भान्जा गुरुङले आफुले पीडितहरुको अवस्थाको बारेमा लिल बहादुर थापालाई जानकारी गराएपश्चात अमेरीकाबाट सहयोग पठाउनुभएको र त्यो सहयोग रकम वितरण गर्न पाउँदा खुसी लागेको बताउनुभयो ।

सहयोग रकम ग्रहण गर्दै दुवै परिवारले सहयोगी थापा प्रति धन्यवाद व्यक्त गरेका थिए । उनीहरुले समाजसेवी थापाले देशका विभिन्न ठाउँमा सहयोग गरेको आफुहरुले थाहा पाएको भन्दै आज आफैलाई सहयोग गरेको प्रति आभार व्यक्त गरेका थिए ।

समाजसेवी लिल बहादुर थापाले आफ्नै गाउँका विपन्न अवस्थामा रहेका नागरिकहरुको बारेमा थाहा पाएर सहयोग गर्न पाउँदा खुसी लागेको प्रतिक्रिया दिनुभयो । जिटिभि नेपालसगं कुराकानी गर्दै उहाँले यस्तो सहयोग निरन्तर गर्ने बताउनुभयो ।

लामो समयदेखि अमेरीकामा कार्यरत थापाले शनिवार मात्रै गुल्मीको मुसिकोट नगरपालिकामा सहाराविहिन महले जिसीलाई व्यक्तिगत खर्चमा घर निर्माण गरि हस्तान्तरण गर्नुभएको थियो । यसबाहेक उहाँले अहिलेसम्म एकल खर्चमा ४ जना परिवारलाई घर निर्माण गरिदिई हस्तान्तरण गर्नुभएको थियो । आफ्नो गृह पालिका खजुराकै लिलावती खत्रीलाई समेत उहाँले घर निर्माण गरिदिनुभएको थियो।

त्यस्तै बागलुङको बडिगाड गाउँपालिका वडा नं ५ मा ओडारमा बस्ने जुना दमाईको परिवारलाई घर निर्माण गरि आफु नेपाल आएको समयमा हस्तान्तरण गर्नुभएको थियो । गुल्मीको रेसुगां नगरपालिका पराल्मीका एक परिवारलाई पनि उहाँले सहयोग गर्नुभएको थियो ।

१८ घण्टासम्म काम गर्ने उहाँले आफुले कमाएको सम्पूर्ण पैसा दिनदुखीलाई सहयोग गर्दै आउनुभएको छ । उहाँले नेपालका विभिन्न जिल्लामा रहेका गरिब, असहाय र विपन्न एवम् आर्थिक अभावमा उपचार नपाएकाहरुलाई थुप्रै सहयोग गर्नुभएको छ । जिटिभि नेपालबाट प्रशारण हुने कार्यक्रम सघंर्षका कथा मार्फत उहाँले हजारौँ परिवारलाई सहयोग गरिरहनुभएको छ ।