मुख्यमन्त्री पाण्डेद्वारा उदय रिघा बुद्ध विहारकोे उद्घाटन

अनिश पाठक, बागलुङ: गण्डकी प्रदेशका मुख्यमन्त्री सुरेन्द्रराज पाण्डेले प्रदेशमा ‘एकघर एक धारा’ को खानेपानी आयोजना आफ्नो सरकारको पहिलो प्राथमिक्ता भएको बताएका छन । अहिलेको अबस्थामा पनि नागरिक खानेपानीको सेवाबाट बञ्चित हुनु दुखत रहेको पाण्डेले बताउनुभयो ।

गलकोट नगरपालिका–११ रिघामा अवस्थित उदय रिघाबुद्ध विहारकोे उद्घाटन गर्दै मुख्यमन्त्री पाण्डेले सो कुरा बताउनुभएको हो । रिघाको गुम्बा पर्यटकीय क्षेत्र भएकाले यसको विकासका लागि प्रदेश सरकारले सक्दो सहयोग गर्ने प्रतिबद्धता समेत व्यक्त गर्नुभयो ।

स्थानियले नै गुम्बाको मिलेर संरक्षण र प्रवद्र्धन गर्नुपर्ने उल्लेख गर्दै उहाँले प्रदेशको आगामी बजेटमा शिक्षा, स्वास्थ्य, कृषि उत्पादन र बजारिकरणमा जनताले बुझ्ने तरिकाले योजना अगाडि ल्याइने बताउनुभयो ।

विदेश कमाउन जाने युवालाई गाउँमै रमाउने कार्यक्रम ल्याउने र लिफ्टिङमार्फत खानेपानी योजना सञ्चालन गर्नुपर्ने क्षेत्रमा प्रदेश सरकारले निःशुल्क विद्युत्को व्यवस्था गर्ने समेत उहाँले घोषणा गर्नुभयो ।

उक्त गुम्बाको सङ्घ सरकार, प्रदेश सरकार, स्थानीय सरकार र वैदेशिक रोजगारीको सिलसिलामा विभिन्न देशमा रहेका नेपालीको सहयोगमा सङ्कलित रु ८० लाख रकमबाट निर्माण गरिएको हो ।

कार्यक्रममा प्रदेशका उद्योग, पर्यटन, वन तथा वातावरणमन्त्री दिपेन्द्रबहादुर थापाले रिघालाई धार्मिक पर्यटकीय क्षेत्रका रुपमा विकास गर्नुपर्ने बताउनुभयो ।

उक्त कार्यक्रममा भिक्षु महासङ्घका केन्द्रिय सदस्य भान्ते निराङ्करले सो उदय रिघाबुद्ध विहार भिक्षुलाई हस्तान्तरण गर्नुभएको थियो । १२ वर्षअघि शिलान्यास गरिएको गुम्बा निर्माण समितिका अध्यक्ष शेरबहादुर घर्तीको पहलमा निर्माण गरिएको हो।