रुपन्देही: रुपन्देही-२ को मतगणना रोकिएको छ। एमाले उपाध्यक्ष विष्णु पौडेल र राष्ट्रिय स्वतन्त्र पार्टीका गणेश पौडेलको टक्कर रहेको यहाँ मतगणनाका क्रममा मतपेटिकामा हस्ताक्षर नमिलेका बढी मतपत्र भेटिएको छ।
पेटिकामा बढी मतपत्र भेटिएपछि राष्ट्रिय स्वतन्त्र पार्टी, नेकपा माओवादी र नेपाली कांग्रेस लगायतका दलहरूले धर्ना दिएका छन्। एउटा बाकस गन्दै जाँदा ३३ मत बढी भेटिएको र कतिपय मतपत्रमा हस्ताक्षर नमिलेको गणनामा संलग्न शंकर गाहाले बताए।
केही मत गणना बाँकी रहँदा पेटीकामा धेरै मत भेटिएपछि अहिले गणना स्थगित गरी धर्ना शुरु भएको छ। क्षेत्र न २ का निर्वाचन अधिकृत उद्वीर नेपाली उम्मेदवारी दर्तामा पुगेका दलहरुलाई फरक-फरक व्यवहार गरेपछि विवादित छन्। एमाले बाहेकका दलहरुले केहिबेरमा पत्रकार सम्मेलन गर्न लागेका छन्।
निर्वाचन अधिकृत नेपालीले भने डाटा राख्ने विषयमा विवाद भएको र केहिबेरमा सुचारू हुने दाबी गरे। बढी मतपत्र भेटिएको नभइ डाटा राख्ने बेला महिला-पुरुषको फरक टिपिएका कारण समस्या भएको कम्प्युटर अपरेटर बुद्धि पराजुलीले बताए। -सेतोमसी
|
ओझेलका खबरलाई फेसबुक, एक्स, इन्स्टाग्राम वा टिकटकमा फ्लो गर्नुहोस्। कार्यक्रम ओझेलका खबर र ओझेलका खबर डटकम विशेष रिपोर्टहरु हेर्न Ojhelka Khabar TV युट्युब च्यानल सब्स्क्राइब गर्नुहोस्। |
