तीजकै दिन गुल्मेली चेलीको युएईबाट उद्धार

गुल्मी: युएईमा बन्धक बनाइएकी गुल्मीकी एक युवतीलाई जिल्ला प्रशासन कार्यालय गुल्मीको सहयोगमा मंगलबार (तीजकै दिन) उद्धार गरेर नेपाल फर्काइएको छ। गुल्मीको इस्मा गाउँपालिका-२ की २० वर्षीय सपना नेपाली (नाम परिवर्तन) लाई मानव तस्करहरूले बन्धक बनाएका थिए।

ओमनको मस्कट हुँदै मंगलबार बिहान साढे ८ बजे काठमाडौंस्थित त्रिभुवन अन्तर्राष्ट्रिय विमानस्थलमा ओर्लेकी उनलाई मंगलबार नै गुल्मी पठाइएको छ । सात वर्षकै उमेरमा अर्काको घरमा काम गर्न गुल्मीको रिडीमा बसेकी उनी एसईईको परीक्षापछि विदेश गएकी थिइन्।

विदेशको वेदना सुनाउँदै उनले भनिन्, ‘हामी १४/१५ जना दिदीबहिनीहरु एउटै कोठामा बन्धक थियौं, बाहिर हिँड्न दिँदैनथे।’ आफूहरुलाई त्यहाँबाट इराक पठाउने तयारी भइरहेको अवस्थामा आफन्तलाई खबर गरेपछि उद्धार गरिएको उनले बताइन्। आफूसँगै रहेका अन्यको भने उद्धार हुन बाँकी रहेको उनले बताइन्।

गुल्मीका प्रमुख जिल्ला अधिकारी पुण्यविक्रम पौड्यालले गुल्मेली चेलीको उद्धार गर्न सफल भएकोमा खुसी व्यक्त गरे। ‘विदेशमा छोरी बन्धक भएको उजुरी लिएर उनकी आमा प्रशासनमा आउनु भएको थियो, हामीले उनको उद्धारका लागि गृह मन्त्रालय, वैदेशिक रोजगार विभागदेखि विभिन्न निकायमा समन्वय गर्यौं,’ प्रजिअ पौड्यालले भने, ‘अन्ततः सबैको प्रयासले उनको उद्धार भयो।’ रातोपाटीमा खबर छ।