गुल्मीमा कांग्रेसको जिल्ला सभापतिको मतदान रोकियो अन्तिम चरणमा

गुल्मी: नेपाली कांग्रेसको गुल्मी जिल्ला सभापतिका लागि भएको मतदान रोकिएको छ। शुक्रबार सुरु भएको अधिवेशनमा सभापतिका लागि खिलध्वज पन्थी र वेदबहादुर थापा मगर उम्मेदवार छन्।

जिल्ला सभापतिको उम्मेदवारमा आकांक्षीको रुपमा उभिएका पन्थी पौडेल पक्ष र थापा देउवा पक्षधर नेता हुन्। एक स्थानीय तहको मतदान चलिरहेका बेला केही मतपत्रमा संकेत गरेको भेटिएको भन्दै विवाद भएपछि मतदान स्थगित गरिएको हो।

रोकिएको मतदान सुरु गर्ने विषयमा छलफल गर्न उम्मेदवारसहितको बैठक बोलाइएको कांग्रेसको जिल्ला सभापति भुवनप्रसाद श्रेष्ठले बताए। सभापति चयनका लागि शनिबार बिहान मतदान सुरु भएको थियो।

दुई जना जिल्ला उपसभापतिका लागि ५ जनाबीच प्रतिस्पर्धा भएको छ। जसमा अनन्तराम पौडेल, शिबबहादुर खत्री, झबिन्द्र विश्वकर्मा, सुर्दशन खनाल र विष्णुकुमारी सापकोटाबीच प्रतिस्पर्धा भएको छ।

दुई जना जिल्ला सचिव पदका लागि ५ जनाबीच प्रतिस्पर्धा भएको छ। सचिवमा पृथ्वीबहादुर फौजदार, जगदिस भट्टराई, भगतसिंह खड्का, थम्मनबहादुर केसी र पूर्ण केसीले उम्मेदवारी दिएका छन्। दुईजना सहसचिव पदका लागि ४ जनाबीच प्रतिस्पर्धा भएको छ। धर्मराज पाण्डे, रेशम कुँवर, छविलाल पाण्डे र निरज मरासिनीले सहसचिवमा उम्मेदवारी दिएका छन्।

जिल्ला सदस्य पदमा ५० जना भन्दा बढीले उम्मेदवारी दिएका छन्। जिल्ला कार्यसमितिमा ७ पदाधिकारीसहित ४५ सदस्यीय हुनेछ। यो खबर अनलाइन खबर डटकममा यो खबर प्रकाशित छ।