गुल्मीका अर्का डिएसपी पन्थीलाई अन्तर्राष्ट्रिय अवार्ड

गुल्मी: गुल्मी घर भएका नेपाल प्रहरीका एक जना डिएसपी उत्कृष्ट प्रहरी अधिकृतका रुपमा पुरस्कृत भए लगत्तै गुल्मी नै घर भएका अर्का डिएसपीले अन्तर्राष्ट्रिय अवार्ड नै हासिल गरेको खबर प्राप्त भएको छ।

उपत्यका अनुसन्धान कार्यालयको पिल्लर नम्बर ८ मा वैदेशिक रोजगार ठगीसम्बन्धी मुद्दाको अनुसन्धान अधिकृतका रुपमा कार्यरत डिएसपी गोविन्द पन्थीले अन्तर्राष्ट्रिय अवार्ड पाएका हुन। गुल्मीको मदाने गाउँपालिका-७, भनभने निवासी पन्थीलाई किन इन्डिया नामक संस्थाले उक्त अवार्ड प्रदान गरेको हो।

त्रिभुवन अन्तर्राष्ट्रिय विमानस्थलमा भिजिट भिसाको जालो डिएसपी पन्थी नेतृत्वको टिमले ब्रेक गर्न सफल भएको थियो। ‘किन इन्डिया’ मानव बेचबिखन तथा ओसारपसार विरुद्ध काम गर्ने संस्था हो।

प्रहरीको मानव बेचबिखन अनुसन्धान ब्युरोमा रहँदा डीएसपी पन्थीले मानव बेचबिखन विरुद्ध उत्कृष्ट अनुसन्धान गरेको सो संस्थाको ठहर छ। सन् २०२३ मा बेचबिखनको क्षेत्रमा उत्कृष्ट अनुसन्धान गरेको भन्दै संस्थाका अध्यक्ष नवीन जोशी र सल्लाहकार इन्द्र भट्टराई सहितको टिमले उनलाई अवार्ड हस्तान्तरण गरेका हुन्।

अवार्ड हस्तान्तरण कार्यक्रममा उपत्यका अपराध अनुसन्धान कार्यालयका एसएसपी सोमेन्द्रसिंह राठौर पनि सहभागी थिए। दिल्लीस्थित राजदूतावासमा आयोजित कार्यक्रममा जान नपाएपछि सो संस्थाले उनलाई मिनभवनस्थित अपराध अनुसन्धान कार्यालयमा नै अवार्ड प्रदान गरेको थियो। पन्थीले २९ बर्षे सेवा अवधिमा अपराध अनुसन्धानमा अन्य थुप्रै उल्लेखनीय कार्य गरेको बताइन्छ।

पन्थी प्रहरी निरक्षक छँदा जिल्ला प्रहरी कार्यालय अर्घाखाँचीमा पनि सह्रानीय कार्य गरेको त्यहाँका सरोकारवाला बताउछ्न। उता गुल्मी कै नेपाल प्रहरीका डिएसपी भोजराज पाण्डे जिल्ला प्रहरी कार्यालय मुस्ताङमा कार्यरत भई उत्कृष्ट कार्य सम्पादन गरेबापत गत शुक्रबार पुरस्कृत भएका थिए।

यो पनि: गुल्मीका डिएसपी पाण्डे उत्कृष्ट प्रहरी अधिकृतका रुपमा पुरस्कृत हुने