स्व. आमाको स्मृतीमा विद्यार्थीलाई न्यानो कपडा र शैक्षिक सामाग्री वितरण

गुल्मी: आफ्नी स्व. आमाको स्मृतीमा मुसिकोटका एक परिवारले आफुले अध्ययन गरेको विद्यालयका विद्यार्थीहरुलाई न्यानो कपडा र स्टेशनरी सामाग्री वितरण गर्नुभएको छ ।

मुसिकोट नगरपालिका वडा नं ३ बल्लेघाट निवासी छोरा प्रताप खत्री, बुहारी सरस्वती खत्री र नाति प्रशन्न खत्रीले स्वं आमा मान कुमारी खत्रीको स्मृतीमा भगवती प्राथमिक विद्यालयमा अध्ययनरत विद्यार्थीहरुलाई विद्यालय पोशाक र कपी तथा कलम वितरण गर्नुभएको हो ।

बिहिवार विद्यालयमा आयोजित एक कार्यक्रममा सो विद्यालयमा अध्ययनरत २० जना विद्यार्थीहरुलाई सहयोग सामाग्री हस्तान्तरण गरिएको समाजसेवी अर्जुन केसीले जानकारी दिनुभयो । सहयोगदाता प्रताप खत्री हाल वैदेशिक रोजगारीका शिलशिलामा दुबईमा कार्यरत हुनुहुन्छ ।

सहयोग सामाग्री हस्तान्तरण कार्यक्रममा सहयोगदाता सरस्वती खत्रीले विदेशका श्रम गरेर कमाएको पैसाले थोरै भएपनि आफ्नो गाउँठाउँमा रहेका ससाना बालबालिकाहरुको अध्ययनका लागि सहयोग गर्ने उद्धेश्यले न्यानो कपडा र स्टेशनरी सामाग्री वितरण गरिएको बताउनुभयो । उहाँले सहयोग सामाग्रीको सही सदुपयोग गर्न समेत आग्रह गर्नुभयो ।

कार्यक्रममा बोल्दै मुसिकोट नगरपालिका वडा नं ३ का वडासदस्य थम्मन बहादुर जिसिले परदेशमा आफ्नो श्रमबाट आर्जित कमाईको केही अंश कटाएर विद्यालयमा सहयोग गरेकोमा धन्यवाद व्यक्त गर्नुभयो । साथै जिसीले उक्त विद्यालयमा अध्ययनरत विद्याथीहरुलाई आफुले पनि १/१ दर्जन कापी र कलम दिन प्रतिबद्धता समेत व्यक्त गर्नुभयो ।

विद्यालयका पूर्व प्रधानाध्यापक गोविन्द प्रसाद खरालले विशेषगरी कुमाल समुदाय र विपन्न नागरिकहरका छोराछोरीहरुले अध्ययन गर्ने विद्यालयमा सहयोग हस्तान्तरण गरेर खत्री परिवारले पुण्यको काम गरेको बताउनुभयो ।

व्यवस्थापन समितिका पूर्व अध्यक्ष दुर्गा बहादुर खत्रीले आर्थिक अवस्था कमजोर भएका परिवारका बालबालिकाहरुले अध्ययन गर्ने विद्यालयमा अरु व्यक्तिहरुले पनि सहयोग गर्नुपर्ने जरुरी रहेको बताउनुभयो ।

विद्यालय व्यवस्थापन समितिका अध्यक्ष रामु खत्रीको अध्यक्षतामा सम्पन्न कार्यक्रममा विद्यालयका पूर्व प्रधानाध्यापक झविलाल भण्डारी, समाजसेवी बिष्णु भण्डारी लगायत स्थानीयहरुको उपस्थिति रहेको थियो । विद्यालयका प्रधानाध्यापक ईन्द्रा घर्ती मगरको स्वागत मन्तव्य र पत्रकार दिपक नेपालीको सञ्चालनमा सम्पन्न भएको थियो ।