काठमाडौं: दर्शकले युट्युबमा हास्य सिरियललाई निक्कै रुचाएका छन। त्यसैले पनि युट्युबको ट्रेन्डिङमा हास्य सिरियलहरुकै वर्चस्व देखिन्छ।
विगत १० भागदेखि प्रसारण भइरहेको कमेडी सिरियल ‘उकुस मुकुस’लाई पनि दर्शकले रुचाएको यसको निर्माणपक्षले बताएको छ। सार्वजनिक १० भागमध्ये चारवटा भाग नेपालको युट्युब ट्रेन्डिङमा परेको निर्माणपक्षको भनाइ छ।
यो सिरियलमा दिलीप तामाङ ‘हुरहुर’, वेदना राई, देवी आले, प्रकाश लिम्बू, नहकुल भट्टराई, टुल्कु तामाङ, रमेश बुढामगर, दीपक लम्साल, सोहन थापा, जयनन्द लामा, रामचन्द्र अधिकारी लगायतका कलाकारको अभिनय छ।
यो सिरियलमा पटकथा तथा संवाद केदारप्रसाद घिमिरे र दिलीप तामाङको छ। यस्तै, लेखन सुपरीवेक्षणको रुपमा केदारप्रसाद घिमिरेले काम गरेका छन्।
लोकचन्द्र थापाको छायांकन रहेको यो सिरियलमा सुविन दाहालको सम्पादन, नहकुल भट्टराईको लगानी, दिलीप तामाङ र सीतादेवी तिमिल्सिनाको निर्देशन रहेको छ।
आफूहरुले सिरियलमा गाउँघरका विषयवस्तुलाई उठान गरेकाले पनि दर्शकले रुचाएको निर्माता नहकुल भट्टराईले जानकारी दिए। ‘उकुसमुकुस’को पछिल्लो भाग नेपालको युट्युब ट्रेन्डिङको नवौं नम्बरमा छ।
