बार एशोसिएसनको भवन अगाडि किन भयो दुई वकिलबीच कुटाकुट?

काठमाडौं: नेपाल बार एशोसिएशनको भवन परिसरमा दुई जना कानून व्यवसायीहरुवीचनै कुटाकुट भएको छ।

प्रधानन्यायाधीश चोलेन्द्रशमशेर जबराको राजीनामा माग्दै न्यायाधीशहरुले इजलास बहिष्कार गरिररहेका छन्। त्यही विषयमा मिडियामा बोलिरहेका एक वकिलमाथि अर्का वकिल जाइलागेका हुन्।

अधिवक्ता भूमिनन्द चुँडालले इजलास चल्नुपर्ने राय राखेर मिडियामा आफ्नो भनाई राखिरहेको बेलामा अर्का अधिवक्ता विराट न्यौपानेले उनीमाथि प्रहार गरेका थिए। कुटाई खाएका अधिवक्ता चुँडालले भने आफू कानूनी उपचारमा जाने बताईसकेका छन्। न्यौपानेले चाहिँ ‘सामान्य विवाद भएको’ भन्दै कुरा मिलिसकेको बताए।

पछिल्लो समय प्रधानन्यायाधीश चोलेन्द्र शमशेर जबराको राजीनामा मागेर बारले आन्दोलन गर्ने चेतावनी दिएको छ। न्यायाधीशहरुले पनि इजलास बहिष्कार गर्दै आएका छन्। तर, कानून व्यवसायीहरु प्रधानन्यायाधीश जबराको राजीनामाको पक्ष र विपक्षमा उभिएका छन्। केही कानून व्यवसायीहरुले यसरी न्यायालयलाई बन्धक बनाउन नहुने धारणा राखेका छन्।