अवरुद्ध बागलुङको काठेखोला पुल अस्थायी रुपमा सञ्चालनमा

बागलुङ: अविरल बर्षाका कारण काठेखोला माथीबाट आएको ठुलो चट्टानले क्षतिग्रस्त कालीगण्डकी करिडोर अन्तर्गतको काठेखोला पुल अस्थायी रुपमा सञ्चालनमा आएको छ।

केहि दिन देखि परिरहेको अविरल बर्षाका कारण असार १ गते रातीको समयमा काठेखोला माथिबाट आएको चट्टानले खोला थुनेपछि पुलमा क्षती पुर्याएको थियाे। पुलको बागलुङ बजार तर्फको भागमा ठूलो क्षती पुगेकाे हाे।

यो पनि हेर्नुहोस्: यसरी भत्कियो बागलुङ, काठेखोलाको पक्की पुल (भिडियो सहित)

पुलमा क्षती हुँदा जिल्लाको दक्षिण भेग सडक सम्पर्क बिहिन बनेको छ। बागलुङ नगरपालिका-१२,१३,१४ जैमिनी नगरपालिका र बरेङ गाउँपालिकाका अत्यावश्यक सेवाका सवारी साधन पनि आवतजावत गर्न समस्या परेको थियो। डिभिजन सडक कार्यालय बागलुङका अनुसार अस्थायी रुपमा पुलको मर्मत गरी शनिबार साँझबाट सञ्चालनमा आएपनी ठूला सवारी छिर्न नसक्ने बताइएको छ।

डिभिजन सडक कार्यालय बागलुङका ईन्जियिर सुरेन्द्र गौतमका अनुसार पहिरोका कारण भत्किएको काठेखोलाको पुल अस्थायी रुपमा निर्माण गरेर यातायात सेवा सुचारु गरेपनि पानीको बहाव कम हुँदा साथ स्थायी रुपमा पूर्वाधार निर्माण गरिने छ। पुल सञ्चालनमा आएसंगै बागलुङको दक्षिणभेग चारदिनपछि पुन सडक सञ्जालमा जोडिएको छ।