परीक्षा सकेर घर फर्कँदै गरेका विद्यार्थी दुर्घटनामा

बागलुङ: बागलुङ नगरपालिका–३ रातमाटामा बुधबार दुई वटा जिप एकआपसमा ठोक्किँदा एसईई ग्रेडवृद्धि परीक्षा दिएर घर फर्किरहेका चार जना विद्यार्थी घाइते भएका छन्।

दिउँसो करिब २ बजे बागलुङ बजारबाट बुर्तिबाङतर्फ जाँदै गरेको लु १ ज २७३९ नम्बरको जिप र विपरीत दिशाबाट आउँदै गरेको लु २ च ६२०५ नम्बरको बोलेरो जिप रातमाटामा ठोक्किएको जिल्ला प्रहरी कार्यालय बागलुङले जनाएको छ।

दुर्घटनामा निसीखोला गाउँपालिका–४ की १६ वर्षीया रेनु विक, १७ वर्षीया लक्ष्मी सुनार, १७ वर्षीया दिलमाया रसाइली तथा निसीखोला गाउँपालिका–३ बोहोरागाउँका १५ वर्षीय हिमाल शाही ठकुरी घाइते भएका छन्। उनीहरू एसईई ग्रेडवृद्धि परीक्षा दिएर घर फर्किरहेका विद्यार्थी रहेको प्रहरीले जनाएको छ।

जिल्ला प्रहरी कार्यालय बागलुङका सूचना अधिकारी प्रहरी नायब उपरीक्षक रामेश्वर त्वातीका अनुसार घाइतेहरूको शरीरका विभिन्न भागमा चोट लागेको छ। उनीहरूलाई तत्काल उद्धार गरी धौलागिरी अस्पताल बागलुङमा उपचारका लागि भर्ना गरिएको छ।

दुर्घटनापछि दुवै सवारी चालकलाई प्रहरीले नियन्त्रणमा लिई घटनाबारे थप अनुसन्धान अघि बढाएको जनाएको छ।