नेपाल नेदल्यान्ड्ससँग २० रनले पराजित

काठमाडौँ: महिला त्रिकोणात्मक टि ट्वान्टी सिरिजमा नेपाल नेदल्यान्ड्ससँग पराजित भएको छ।

कीर्तिपुरस्थित टियु मैदानमा भर्खरै सम्पन्न आफ्नो पहिलो खेलमा नेदरल्यान्ड्ससँग २० रनले पराजित हुँदै नेपालले हारबाट प्रतियोगिताको सुरुवात गरेको हो ।

नेदल्यान्ड्सले दिएको १५८ रनको लक्ष्य पछ्याएको नेपालले २० ओभरमा ७ विकेट गुमाएर १३७ रन मात्र बनाउन सक्यो ।

नेपालका लागि सिता रानामगरले सर्वाधिक २८ रन बनाइन् । त्यस्तै कविता जोशीले २७ तथा पुजा महतोले २४ रन बनाइन् ।

नेदल्यान्ड्सका लागि इभा लिन्च र क्यारोलिन डे लाङले २-२ विकेट लिए । आइरिस विलिङ र फ्रेडरिक ओभरडाइकले १-१ विकेट लिए ।

त्यसअघि त्रिवि क्रिकेट मैदान कीर्तिपुरमा टस हारेर पहिले ब्याटिङ गरेको नेदल्यान्ड्सले २० ओभरमा ४ विकेट गुमाएर १५७ रन बनाएको थियो ।

नेदरल्याण्ड्सका लागि रोबिन रिकेले अविजित अर्धशतकीय पारी खेलिन् । उनले ४८ बलमा ५९ रन बनाइन् । त्यस्तै आइरिस विलिङले १३ बलमा ३१ रनको योगदान दिइन् ।

नेपालका लागि कविता कुँवर, पुजा महतो, सिता राना मगर र ईश्वरी विष्टले एक-एक विकेट लिए ।

आजदेखि सुरु भएको सिरिजमा सबै टोलीले एक अर्कासँग ३-३ खेल खेल्ने छन् । नेपालले दोस्रो खेल शनिबार थाइल्याण्डसँग खेल्ने छ । माघ २० मा नेदरल्याण्ड्स, माघ २२ मा थाइल्याण्ड, माघ २३ मा नेदरल्याण्ड्स र माघ २५ मा थाइल्याण्डसँग खेल्ने छ ।

सबै खेल सकिँदासम्म धेरै खेल जितेर उच्च अंक जोड्ने टिम सिरिजको विजेता बन्ने छ ।