गुल्मीमा मलामी बोकेको जिप दुर्घटना हुँदा एकजनाको मृत्यु

गुल्मी: गुल्मीमा मलामी बोकेको जीप दुर्घटना हुँदा १ जनाको मृत्यु भएको छ भने १२ जना घाईते भएका छन्।

जिल्लाको सत्यवती गाउँपालिका-४, मौरीओडार स्थित शाहघाट लिम्घा भित्री सडक खण्डमा रुद्रवेणीबाट मलामी लिएर लिम्घा तर्फ फर्किँदै गरेको लु १ च ४३२० नं. को पिकअप गाडी दुर्घटनामा परेको हो।

दुर्घटनामा सत्यवती गाउँपालिका-४, लिम्घाका ७५ वर्षीय मन बहादुर फुम्जालीको मृत्यु भएको जिल्ला प्रहरी कार्यालय गुल्मीका प्रहरी नायव उपरीक्षक शंकर पोखरेलले जानकारी दिए। फुम्जालीको उपचारको क्रममा मृत्यु भएको हो।

दुर्घटनामा परी सोही ठाउँका कृष्ण थापा, यस बहादुर बुढाथोकी, खेमु श्रीस, दुर्गा बहादुर राना भुपेन्द्रदेव खप्तरी (थापा), पदम ब. बुढाथोकी, भरत बुढाथोकी, मिलन राना, ठग ब. बुढाथोकी, घनश्याम बुढाथोकी, चिन ब. राना र चालक शंकर बि.क. घाईते भएका छन्।

जीप ब्रेक फेल भई सडक देखी झण्डै ४० मिटर तल खसेको प्रहरीले जनाएको छ। घाईतेहरु मध्ये ४ जनालाई थप उपचारका लागि पाल्पा रेफर गरिएको छ भने बाँकी सबैको जोहाङ प्राथमिक स्वास्थ्य केन्द्रमा उपचार भईरहेको छ।