पछिल्लो २४  घण्टामा सवारी  दुर्घटनामा परी ९ जनाको मृत्यु, थप घाइते

​  पुजा गौतम

 बुटवल । देशका विभिन्न स्थानमा भएका अलग-अलग सवारी दुर्घटनामा परी ९ जनाको ज्यान गएको छ। नवलपरासी पश्चिम, बारा, बाँके, कञ्चनपुर, चितवन, दाङ, उदयपुर, दार्चुला र मोरङमा भएका दुर्घटनामा परी उनीहरूको मृत्यु भएको हो।

​१. नवलपरासी पश्चिम: पैदलयात्री महिलाको उपचारका क्रममा मृत्यु

नवलपरासी पश्चिमको बर्दघाट नगरपालिका–१४ खजुरा खोलास्थित सडकमा बर्दघाटबाट धर्मबस्तीतर्फ जाँदै गरेको लु.प्र.०१–०१२ प ६३५५ नम्बरको मोटरसाइकलको टक्करबाट पैदलयात्री स्थानीय ८१ वर्षीया अनिसरा हिस्की मगर घाइते भएकी थिइन्। चौपत्तास्थित सामुदायिक अस्पतालमा उपचारपछि घर ल्याइएकी उनको असोज १९ गते बेलुकी १८:३० बजे घरमै मृत्यु भएको छ।

​२. बारा: स्कुटर र मोटरसाइकल ठोक्किँदा घाइते भएका खनालको निधन

बाराको निजगढ नगरपालिका–५ शान्ति टोलस्थित भित्री सडक खण्डमा प्र.२–०३–०१८ प ८३९० नम्बरको स्कुटर र प्र.२–०३–०१५ प ७१२९ नम्बरको मोटरसाइकल एकापसमा ठोक्किएका थिए। दुर्घटनामा गम्भीर घाइते भएका स्कुटर चालक ४५ वर्षीय राज मनि खनालको काठमाडौँस्थित बाँसबारी न्युरो अस्पतालको भेन्टिलेटरमा उपचारका क्रममा असोज १९ गते मृत्यु भएको छ।

​३. बाँके: डिभाइडरमा मोटरसाइकल ठोक्किँदा युवाको मृत्यु

बाँकेको नेपालगञ्ज उपमहानगरपालिका–१८ भुजईगाउँस्थित सडकमा भे १४ प ७०३० नम्बरको मोटरसाइकल अनियन्त्रित भई डिभाइडरमा ठोक्किएको थियो। दुर्घटनामा गम्भीर घाइते भएका २५ वर्षीय सौगात कुँवरलाई थप उपचारका लागि भारतको लखनउ लैजाने क्रममा बाटोमै मृत्यु भएको छ।

​४. कञ्चनपुर: अनियन्त्रित मोटरसाइकल दुर्घटनामा युवकको ज्यान गयो

कञ्चनपुरको कञ्चनपुर वेदकोट नगरपालिका–७ लालपुरमा से.६ प २२० नम्बरको मोटरसाइकल अनियन्त्रित भई दुर्घटना हुँदा २५ वर्षीय विक्रम बम घाइते भएका थिए। महाकाली प्रादेशिक अस्पतालमा उपचारका क्रममा उनको मृत्यु भएको छ।

​५. चितवन: ट्र्याक्टर र बोलेरो ठोक्किँदा महिलाको मृत्यु

चितवनको कालिका नगरपालिका–५ मा ना.६ त ६४४४ नम्बरको ट्र्याक्टर र बा.प्र.०३–०१–०२४ च ३४७३ नम्बरको बोलेरो एकापसमा ठोक्किएका थिए। दुर्घटनामा बोलेरोमा सवार ३५ वर्षीया लक्ष्मी परियारको भरतपुरस्थित पुरानो मेडिकल कलेजमा उपचारका क्रममा मृत्यु भएको छ।

​६. दाङ: बस र अटो ठोक्किँदा दुई महिने शिशुको मृत्यु

दाङको लमही नगरपालिका–३ मझगाउँस्थित पूर्व-पश्चिम राजमार्गमा लु.प्र.०२–००१ ख ०११९ नम्बरको बस र लु.प्र.–०२–००१ ह १५७१ नम्बरको अटो एकापसमा ठोक्किएका थिए। दुर्घटनामा अटोमा सवार प्युठान सरुमारानी गाउँपालिका–३ की सरुमारानी गाउँपालिका–५ हात्तिखाल बस्ने ४५ वर्षीया नमिसरा बराल र उनकी २ महिनाकी नातिनी जेनिशा सोमै घाइते भएका थिए। २ महिनाकी शिशु जेनिशा सोमैको उपचारका क्रममा लमही अस्पतालमा मृत्यु भएको छ।

​७. उदयपुर: ट्र्याक्टर र मोटरसाइकल ठोक्किँदा दले पुन मगरको मृत्यु

उदयपुरको बेलका नगरपालिका–०६ किराँत चोकमा को १ क ३४१८ नम्बरको ट्र्याकको अगाडीको टायर पञ्चर भई अनियन्त्रित हुँदा विपरीत दिशाबाट आउँदै गरेको लु.प्र.०२–००२ प २५४८ नम्बरको मोटरसाइकलसँग ठोक्किएको थियो। दुर्घटनामा मोटरसाइकल चालक रोल्पा सुनछहरी गाउँपालिका–०४ बस्ने ५६ वर्षीय दले पुन मगरको धरानस्थित वी.पी. कोइराला स्वास्थ्य विज्ञान प्रतिष्ठानमा उपचारका क्रममा मृत्यु भएको छ।

​८. दार्चुला: जिपबाट खसेर युवकको मृत्यु

दार्चुलाको मार्मा गाउँपालिका–०३ बिटुलेमा सु.प.प्र.०१–००१ ज १६९० नम्बरको जिपको गुडिरहेको अवस्थामा ढोका खुल्न गई खसेर बैतडी दिलासैनी गाउँपालिका–०२ बस्ने २९ वर्षीय सन्तोष जाग्री घाइते भएका थिए। उनलाई बैतडी जिल्ला अस्पताल लैजाँदा चिकित्सकले मृत घोषणा गरेका छन्।

​९. मोरङ: दुई मोटरसाइकल ठोक्किँदा दिलीप बि.क.को निधन

मोरङको धनपालथान गाउँपालिका–६ रङ्गेली-विराटनगर हुलाकी सडकमा को ११ प ६७४७ र को १९ प २ नम्बरका दुई मोटरसाइकल एकापसमा ठोक्किएका थिए। दुर्घटनामा गम्भीर घाइते भएका २२ वर्षीय दिलीप बि.क.को विराटनगरस्थित कोशी अस्पतालमा उपचारका क्रममा मृत्यु भएको छ।

​सबै घटनाका सम्बन्धमा सम्बन्धित जिल्ला प्रहरी कार्यालयहरूले थप अनुसन्धान अगाडि बढाएका छन्।

​ओझेलका खबर – खबर भित्रको खबर

मिति : २०८३, असोज २०।

पोष्ट समय : दिउँसो १: १२ बजे

………………………………………..

सन्तुलित आलोचना, रचनात्मक सुझाव तथा मार्गदर्शनमूलक टिप्पणीको हामी स्वागत गर्दछौँ। कृपया गालीगलौज तथा अमर्यादित टिप्पणी नगरिदिनुहोला।