गुल्मीको मुसिकोटमा आगो निभाउने क्रममा एकजनाको मृत्यु, एकजना घाइते

गुल्मी: गुल्मीमा अग्नी नियन्त्रणका क्रममा घाईते भएका एकको मृत्यु भएको छ। सोमबार दिउँसो साढे ११ बजेतिर जिल्लाको मुसिकोट नगरपालिका-१, तल्लो पौदी स्थित सल्लाघारिमा लागेको आगो निभाउने क्रममा दुई जना घाईते भएका थिए।

घाइते मध्ये ५८ बर्षिय महले घर्तीको गुल्मी अस्पतालमा उपचारका क्रममा दिउँसो २.५५ बजे डाक्टरले मृत घोषणा गरेको प्रहरीले जनाएको छ।

पौदी स्थित सर्वोदय माविको जग्गाको सल्लाघारीमा आगो निभाउने क्रममा आगाको मुस्लोले पच्छाउदै जाँदा घर्ती सहित बर्ष ५२ का रेशम थापा करिब १५० मिटर तल खसेर गम्भीर घाईते भएका थिए। थापाको गुल्मी अस्पतालमा उपचार भईरहेको र अवस्था सामान्य रहेको बताईएको छ। -फाइल तस्वीर