१५ सयको जागिर गर्ने युवा अहिले सयौँलाई रोजगार दिने कम्पनीको मालिक

गुल्मी: आज भन्दा १५ बर्ष अघि अध्ययनन संगै काम खोज्न गाउँबाट गुल्मीको सदरमुकाम तम्घास छिरेको एकजना बेरोजगार युवाले मासिक जम्मा १५ सयको तलबबाट काम पाएका थिए। हिजोको त्यही युवा अहिले झण्डै २ सय जनालाई रोजगारी दिने करोडौं पुँजी रहेको कम्पनीको मालिक बनेको छ।

ति हुन गुल्मीको सत्यवती गाउँपालिका-४, लिम्घाका होम पल्ली। जो २०६४ सालमा लिम्घा गाउँबाट अहेब पढ्न तम्घास छिरेका थिए। पल्लीले अध्ययन अगाडी बढाउन कसैकहाँ काम खोज्न जरुरी थियो। त्यसका लागि निन्न्याउरो र सेवकी चेहरा लिएर उनी मेडिलल सञ्चालकहरुको सहारा लिनु पर्य । फलतः तम्घासका मेडिकल सञ्चालक शेरबहादुर थापा र महेशकुमार श्रेष्ठ जस्ता अगुवारुले उनलाई साथ दिए। उनैहरुकहाँ मासिक १५ सयको जागिर सुरु गरेका पल्लीले उनैहरुको सहयोगबाट गुल्मी अस्पतालमा करारको जागिर पाए।

२०७६ साल सम्म १४ बर्ष जति करारको जागिर खाएका पल्लीले शुभलक्ष्मी फार्मा एण्ड क्लिनिक पनि सञ्चालन गरे। रेसुङ्गा नगरपालिका-१, अस्पाताल लाईन, तम्घासस्थित रहेको शुभलक्ष्मी क्लिनिक तथा फर्मा २०६८ सालदेखि सञ्चालनमा रहेको छ। यस प्राईभेट संस्थाले रोजगारी सिर्जनामा सरकारले गर्न नसकेको प्रयास गरिरहेको यहाँका अगुवाहरु बताउछन।

त्यस कम्पनीका प्रबन्ध निर्देशक राजेन्द्र विश्वकर्माका अनुसार जिल्ला भित्रका बिरामीहरु लगायत छिमेकी जिल्लाहरु अर्घाखाँची, प्युठान र बाग्लुङका केही पालिकाबाट आउने बिरामीहरुलाई स्वास्थ्य संस्थाबाट उपलब्ध हुने विभिन्न सेवाहरु जस्तै दैनिक अनुभवी डाक्टरद्वारा बिरामी जाँच सेवा, गर्भवती सम्बन्धी सेवा, अल्ट्रासाउण्ड (भिडियो एक्स-रे) सेवा, ई.सि.जी. सेवा, डिजिटल एक्स-रे सेवा, नेशनल प्याथ ल्याव एण्ड रिसर्च सेन्टर सँगको सहकार्यमा प्याथोलोजी सेवा, फार्मेसी तथा बिरामी अवलोकन सेवा, माइनर सर्जरी (नाक, कान तुहिएको, हातखुट्टा भाँचिएको, काटेको घाउ, खटिरा चिरिनुका साथै अन्य सेवा, बाथरोगको पहिचान तथा उपचार सेवा र साप्ताहिक रुपमा विशेषज्ञ डाक्टरहरुद्धारा विभिन्न रोगको जाँच तथा उपचार सेवा प्रदान गर्दै आइरहेको छ। साथै समय-समयमा स्थानीय पालिका, वडा कार्यालय, स्वास्थ्य संस्था तथा विभिन्न सामाजिक संघ संस्था तथा क्लबहरुसँग समन्वय गरी निःशुल्क शिविर लगायत विभिन्न सामाजिक कार्यहरु गर्दै आएको छ। यस संस्थाको बुटवल सहित जिल्लाका मुख्य-मुख्य व्यापारिक केन्द्रमा शाखा समेत रहेका छन।

यस संगै पल्लीले नेपाल प्याथ ल्याव एण्ड रिसर्च सेन्टर प्रालि नामक कम्पनी खोले पछि सफलताको शिखर चुम्न थाले। श्रीमती लक्ष्मी पल्ली समेतको साथले आजको स्थानमा आई पुगेको बताउने पल्लीको सदरमुकाममा अहिले पक्की घर र चिल्लो गाडी छ र कम्पनीको पुँजी मात्रै चार करोड बढिको छ। उनै सफल युवा व्यवसायी तथा त्यस प्रालिका प्रबन्ध निर्देशक पल्ली संग जिज्ञासा राख्दा उनले सुरुवाती संघर्ष स्मरण गर्दा अहिले आफुलाई सपना जस्तै लागेको बताउँछन। उनले थपे, ‘गाउँबाट अहेब पढ्न भनेर तम्घास आईयो। जागिर गर्दै पढ्ने उद्देश्यलाई महेश कुमार श्रेष्ठ अंकल र शेरबहादुर थापा अंकलले साथ दिनु भयो। महेश फार्मामा मासिक १५ सय तलबमा काम गर्थे। एउटै परिवार जस्तो भएर किचनको काम पनि गरियो। क्रमशः संगै अहेब पढ्ने साथी लक्ष्मी संग विवाह भयो। अहिलेको सफलतामा उनको ठूलो हात छ।’

पल्लीले अहिले आफ्नो कम्पनीको पुँजी चार करोड बढिकोे रहेको बताए। अहिले सम्म दुई सय जनाको हाराहारीमा रोजगारी दिन सकिएको प्रति उनले बढि सन्तोष प्रकट गरे। न्युनतम १५ हजार देखि म्यानेजमेन्ट तर्फ ५५ हजार मसिक तलब दिन सकिएको र मेडिकल तर्फ मासिक डेढ लाख सम्म तलब खाने स्वाथ्यकर्मी रहेको उनले सुनाए।

होम पल्ली गुल्मीको हकमा मेडिकल व्यवसायी भन्दा बढि सामाजिक कार्यकर्ताका रुपमा बढि चिनिने युवा हुन। पल्लीले हरेक विपदमा परेका मानिसहरुको उद्धारमा अरु भन्दा एक कदम अगाडी बढ्छन। सामाजिक उत्तरदायित्व अन्तर्गत आफ्नो कम्पनीले बर्षभरी गरेका कार्यक्रमहरु सार्वजनिक गर्छन। गत आर्थिक वर्षको वार्षिक कार्यक्रम पनि पल्लीले केहि दिन अघि सम्पन्न गरेका छन। स्वास्थ्य र सामाजिक क्षेत्रमा उत्कृष्ट कार्य गर्नेहरुलाई सम्मान गर्ने गरेका छन। कला संस्कृति क्षेत्रको विकासमा पनि पल्लीको कम्पनीले योगदान पुराउँदै आएको छ।

स्वदेश मै रोजगारी सिर्जना गरौँ भन्ने उद्देश्य बोकेका पल्ली जस्ता युवा व्यवसायीहरुलाई राज्यले प्रोत्साहन गर्न सके यहाँ तमाम पेशा मार्फत तमाम युवाहरुले तमाम युवाहरुलाई रोजगारी दिन सक्थे भन्ने उदाहरणका पात्र होम पल्लीको सिको अन्य युवाहरुले पनि गर्न सके वैदेशिक रोजगारीमा धाउने क्रम रोकिन सक्ने देखिन्छ।