महिला हिंसा विरुद्ध सचेतना कार्यक्रम सम्पन्न

पाल्पा: महिला हिंसा अन्त्यका लागि हिंसा विरुद्धको सचेतना कार्यक्रम तानसेन ८ को भालेबासमा सम्पन्न भएको छ।

लैङ्गिक हिंसाविरुद्धको १६ दिने अभियानको चौथो दिन तानसेन नगरपालिकाले आयोजना गरेको कार्यक्रम भालेबासमा गरेको हो।

लैङ्िगक हिंसा विरुद्धको १६ दिने अभियान ‘लैङ्गिक हिंसा अन्त्यको सुनिश्चितता: महिला र बालबालिकामा लगानीको ऐक्यवद्धता’ भन्ने नाराका साथ नोभेम्बर २५ देखि सुरु भएको हो।

कार्यक्रमका प्रमुख अथिति प्रतीक्षा गाहा सिंजालिले मानिस शिक्षा र चेतनाको सभ्यतमा बिकास भए पनि पछिल्लो समय असभ्य र हिंस्रक बन्दैगएको अनुभूति भएको बताउनुभयो ।हिंसा अपरिचित ब्यक्तिबाट नहुने भन्दै हिंसा परिचित र नजिककैको ब्यक्तिबाट भइरहेको उहाँको भनाइ थियो । उहाँले समाज जति विकसित भैरहेको छ, तेत्ती नै महिला हिंसाको स्वरूपमा झन अमानवीय ब्यवहार बढ्दै गएकाले महिला सचेतनाका कार्यक्रमलाई प्रभावकारी बनाउँदै लैजानुपर्नेमा जाेड दिनुभयो।

सहजकर्ता अधिवक्ता शान्ति बस्याल र जिल्ला प्रहरी कार्यालय पाल्पाका प्रहरी निरीक्षक श्रीराम भट्टले सचेतना अभिमुखीकरण गराउँदै महिला अब सजग बनेर अगाडि बढ्नु र घरेलु होस वा अन्य कुनै पनि हिंसा सहेर बस्न नहुने बताउनुहुदै हिंसा कस्ता हुन्छन् ,हिंसा बाट कसरी बच्न सकिन्छ,हिंसा कसरी पहिचान गर्ने लगायतका विषयमा कार्यक्रममा सहजीकरण गरिएको थियो ।

कार्यक्रममा तानसेन ७ का वडा अध्यक्ष प्रदीप खनालले महिला ,बालबालिका र पुरुषलाई सचेत बनाउन यस्ता कार्यक्रमले सहयोग पुगेको बताउनुभयो ।आफ्नोतर्फबाट सक्दो सबैलाई सचेत बनाउन पछि नपर्ने बताउदै सचेत समाज निर्माण गर्न पहिले आफैबाट सुरुवात गर्नुपर्ने बताउनुभयो ।

कार्यक्रमको उदेश्य माथि प्रकाश पार्दै कार्यपालिका सदस्य सबिता भट्टराईले प्रायः जसो घरभित्र हुने हिंसा महिला बाट महिलामाथी हुँदै आएको बताउनुभयो ।

यस्तो कार्यक्रम पालिकाको १,२,३,४,५,६ मा हिंसा विरुद्ध को पहिलो दिन नै सम्पन्न गरिसकेको छ भने आज ७,८,१० मा सम्पन्न भएको छ।यस्तो कार्यक्रम बाकी वडामा पनि छिट्टै सम्पन्न गर्ने पालिकाको महिला तथा बालबालिका शाखाका चिना न्यौपानेले जानकारी दिनुभयो । कार्यक्रममा तानसेन ७,८ र १० को जनप्रतिनिधि, महिला सङ्घ संस्थाका प्रतिनिधिको सहभागिता थियो । सचेतना कार्यक्रम तानसेन ८ का वडाअध्यक्ष सोमनाथ अर्यालको अध्यक्षतामा सम्पन्न भएको हो।