शनिबारदेखि बेपत्ता ताराखोलाका भीमबहादुर घर्तीको खोजी तीव्र

बागलुङ: ताराखोला गाउँपालिका-२ का २३ वर्षीय भीमबहादुर घर्ती शनिबार साँझदेखि बेपत्ता भएका छन्।

अर्गलबाट हटिया जाँदै गरेका उनले बेलुकी ६:४५ बजे दिदी राजमती घर्तीलाई फोन गरी आफू आउँदै गरेको जानकारी दिएका थिए। तर अबेरसम्म नआएपछि खोजी गर्दा फोन अफ रहेको पाइयो।

आईतबार बिहान प्रहरीले स्थानीयसँगै खोजी थालेको थियो। खोजी क्रममा ताराखोला–१ गाईघाट झरना नजिक सडक छेउमा झारपात मिचिएको र घर्तीले लगाउने चप्पल भेटिएको छ। तर उनी चलाउने ध १ प ५३०८ नम्बरको नीलो रंगको १५० सिसी मोटरसाइकल भेटिएको छैन।

ईलाका प्रहरी ताराखोला, भातखाने डाँडा र हरिचौर प्रहरी चौकीको टोलीले एक्साभेटरको सहयोगमा खोलामा खोजी गरिरहेको र अब खोजलाई गलकोट हुँदै बडिगाड खण्डसम्मका खोलानदीतिर विस्तार गर्ने तयारी भइरहेको प्रहरीले जनाएको छ।