मलेसियामा बागलुङका शस् बहादुर थापा मगरको निधन

बागलुङ: मलेसियाको क्वालालम्पुर नजिकै रहेको काजाङ क्षेत्रमा बागलुङका शस् बहादुर थापा मगर मृत अवस्थामा फेला परेका छन्। मलेसियामा रोजगारीमा रहेका याम बहादुर र तारा काउचाका भनाइअनुसार, उनको मृत्यु भएको करिब तीन दिन बितिसक्दा पनि शव अझै वेवारिसे अवस्थामा नै छ।

घटनाको वास्तविक कारण अझ स्पष्ट भइसकेको छैन। तर, त्यहाँको स्थानीय प्रहरी र सम्बन्धित निकायहरूले आवश्यक कानुनी तथा प्राविधिक प्रक्रिया अघि बढाइरहेका छन्।

थापा मगर वैदेशिक रोजगारीका लागि केही वर्षअघि मलेसिया पुगेका थिए। उनको असामयिक निधनको खबरले त्यहाँको नेपाली समुदाय मात्र नभई स्वदेशस्थित आफन्त र परिचितहरूलाई पनि गहिरो दुःख दिएको छ।

समुदायका प्रतिनिधि याम बहादुर र तारा काउचाले मृतकको परिवारसँग सम्पर्क गरी कानुनी प्रक्रिया सहज पार्न र शव नेपाल ल्याउन दूतावाससहित सम्पूर्ण नेपाली समुदायको सहयोग आवश्यक रहेको बताएका छन्।