रेभान्स शिवा म्युजिकको नयाँ प्रस्तुति ‘मेची महाकाली’ को छायांकन सम्पन्न

गुल्मी: उत्कृष्ट लोक गीतहरुको निर्माण गर्दै आइरहेको रेभान्स शिवा म्युजिकको नविनतम प्रस्तुति मेची महाकाली म्युजिक भिडियोको छायांकन सम्पन्न गरेर सम्पादनको प्रक्रियामा रहेको र छिट्टै सार्वजनिक गरिने म्युजिक भिडियोका निर्माता तथा सर्जक खिमानन्द खरेलले बताउनुभयो।

वर्तमान परिप्रेक्ष्यमा सर्वोत्कृष्ट लोक गायिका शान्ति श्री परियार संग गुल्मीको शान उपनामले परिचित लोकप्रिय युवा गायक रामचन्द्र चन्दको हृदयस्पर्शी स्वरमा रहेको गीतको संगीत संयोजन चर्चित एरेन्जर विनोद बाजुरालीले गर्नुभएको हो।

सुपर अडियो रहेको गीत जसमा निरन श्रेष्ठको कोरियोग्राफी तथा निर्देशन र लोकप्रिय नितिन वाइवाको सह-निर्देशन रहेको छ। सर्जक खिमानन्द खरेलको आफ्नै भाकामा रहेको यस सिर्जनामा लोक सर्जक हेमनाथ खरालको विशेष सहयोगीको भूमिका रहेको छ।

मुख्य अभिनय लोकप्रिय मोडल विजय पुन र रुविना अधिकारीको रहेको म्युजिक भिडियोको छायांकन राम केसी नेतृत्वको टोलीले गरेको हो। रेभान्स शिवा म्युजिकका सबैखाले प्रविधि अपरेटिङ आइटी विज्ञ राजेन्द्र अर्यालले गर्दै आउनुभएको छ।

रेभान्स शिवा म्युजिकको यो नयाँ सिर्जनाले अत्यधिक चर्चा र धेरै भन्दा धेरै लोक संस्कृतिप्रेमी शुभचिन्तकहरुले रुचाउने विश्वास कोरियामा कार्यरत स्रष्टा हेमनाथ खरालले व्यक्त गर्नुभयो। त्यसैगरी लोक गायक रामचन्द्र चन्दले मेचीकाली निर्माणमा टिमले धेरै मेहेनत गरेकोले यो सिर्जना सफल हुने अपेक्षा राखेको बताउनुभयो।

यस म्युजिक भिडियोका निर्माता खिमानन्द खरेलले भन्नुभयो, ‘अबको एक हप्ता भित्र दर्शक तथा श्रोता माझ यो कोशेली प्रस्तुत गर्नेछौँ। यसले यहाँहरुको मनमा स्थान बनाउने कुरामा हामी विश्वस्त छौँ। तबसम्म हाम्रो युट्युब च्यानल रेभान्स शिवा म्युजिकमा पहिले सार्वजनिक गरिएका सामग्रीहरु हेर्न र च्यानल सब्स्क्राइब गर्न हार्दिक अनुरोध गर्दछु।’

खरालले आफ्ना सिर्जना हेर्न र सुझाव तथा प्रतिकृया दिन र सिर्जनाहरु शेयर गरेर धेरै दर्शक तथा श्रोता माझ पुर्याउन सहयोग गर्न पनि आग्रह गर्नुभएको छ।

म्युजिक भिडियोका निर्माता तथा लोक सर्जक खरेल गुल्मीको वामीमा जन्मेर हाल सिंगापुरमा बसोबास गर्दै आउनुभएको छ। आफू विदेशी भूमिमा रहेर पनि मौलिक नेपाली कला र संस्कृतिको संरक्षण र प्रवर्द्धनमा उहाँको योगदान प्रशंसनीय रहेको छ।