हावाहुरीले रुख ढल्दा दुई महिलाको ज्यान गयो

रोल्पा: रोल्पामा हावाहुरीसँगै आएको वर्षाका कारण रुख ढल्दा दुई महिलाको ज्यान गएको छ।

जिल्लाको थबाङ गाउँपालिका–२ झिङबारीस्थित थबाङ–घोराही सहिद मार्गमा मंगलबार साँझ भएको घटनामा स्थानीय दुई महिलाको मृत्यु भएको प्रहरीले जनाएको छ।

इलाका प्रहरी कार्यालय थबाङका अनुसार हेलोबाङ निवासी अन्दाजी ६० वर्षीया रुजु झाँक्री र ५० वर्षीया मनबुझी झाँक्री थबाङ आधारभूत अस्पतालबाट बिरामी भेटेर घर फर्किंदै गर्दा हावाहुरीका कारण बाटोमाथिबाट उत्तिसको रुख ढलेर उनीहरूलाई च्यापेको थियो।

घटनामा रुजु झाँक्रीको घटनास्थलमै मृत्यु भएको प्रहरीले जनाएको छ। गम्भीर घाइते मनबुझी झाँक्रीलाई उद्धार गरी थबाङ आधारभूत अस्पतालमा उपचारका लागि लगिएको थियो। पछि थप उपचारका लागि पोखरा लैजाँदै गर्दा बुधबार बिहान करिब २ः३० बजे बाटोमै उनको पनि मृत्यु भएको जनाइएको छ।

प्रहरीका अनुसार घटनास्थल इलाका प्रहरी कार्यालय थवाङ बाट करिब ११ किलोमिटर दक्षिणमा पर्छ।

लगातारको हावाहुरी र वर्षासँगै जोखिम बढेकाले आवश्यक सतर्कता अपनाउन स्थानीय प्रशासनले आग्रह गरेको छ।