गुल्मीमा पेप्सी बोकेको ट्रक दुर्घटना, दुई जना घाइते

गुल्मी: गुल्मीको सत्यवती गाउँपालिका–५ हँसरास्थित भित्री कच्ची सडक खण्डमा आज बिहान ट्रक दुर्घटना हुँदा दुई जना घाइते भएका छन्।

आज बिहान करिब ६ बजेको समयमा बुर्तिबाङबाट बुटवलतर्फ जाँदै गरेको लु २ ख ५३७३ नम्बरको पेप्सी-कोकाकोला बोकेको ट्रक ब्याक गर्ने क्रममा अनियन्त्रित भई सडकबाट करिब १० मिटर तल खस्न जाँदा दुर्घटना भएको हो।

दुर्घटनामा ट्रक चालक रुपन्देहीको बुटवल उपमहानगरपालिका–११ जयकुटी निवासी ३४ वर्षीय केशव ज्ञवाली र सोही ट्रकमा सवार तिलोत्तमा नगरपालिका–१ शंकरनगरका ३१ वर्षीय यादव ज्ञवाली घाइते भएका हुन्।

घाइते दुवै जनालाई उपचारका लागि प्राथमिक स्वास्थ्य केन्द्र जोहाङ पठाइएको छ। उनीहरूको अवस्था सामान्य रहेको जनाइएको छ।

दुर्घटनापछि इलाका प्रहरी कार्यालय जोहाङबाट प्रहरी नायब निरीक्षक नरेन्द्र वि.क.को कमाण्डमा खटिएको टोलीले घटनास्थलमा पुगेर थप अनुसन्धान गरिरहेको छ।