गुल्मीको भनभनेमा छोराले सल्काएको आगोले घर-गोठ जलेर नष्ट

गुल्मी: गुल्मीको भनभनेमा गएराती आफ्नै छोराले सल्काएको आगोले घर र गोठ जलेर नष्ट भएको छ। मदाने गाउँपालिका-७, भनभनेको टिमुरखर्क निवासी ७० बर्षिय वृद्ध देव बहादुर वलीको ढुङ्गाले छाएको २ तले कच्ची घर र ढुङगाले छाएको २ तले बङ्गालो निज कै ३८ बर्षिय मानसिक सन्तुलन बिग्रेका छोरा खिम बहादुर वलीले आगो सल्काउदा जलेर नष्ट भएको प्रहरीले जनाएको छ।

उक्त घटनाको जानकारी प्राप्त हुनासाथ ईलाका प्रहरी कार्यालय पुर्कोटदह बाट प्रहरी निरीक्षक रेवन्त सेनको कमाण्डमा ७ जनाको टोली खटिएर उद्धार कार्यमा जुटेको जिल्ला प्रहरी कार्यालय गुल्मीका सूचना अधिकारी डिएसपी गङ्गा बहादुर सारुले जानकारी दिनुभयो।

आगजनी गरेका छोरा फरार रहेको, आगोलागीबाट घरमा रहेको अन्नपात, लत्ताकपडा, भाडा वर्तन जलेर क्षति भए पनि मानवीय तथा चौपाया क्षति नभएको र स्थानियवासी र प्रहरीको सहयोगमा आगो राती नै नियन्त्रणमा लिईएको जनाईएको छ।