जेनजी आन्दोलनमा ‘नेपाल आमा रोएको देख्न सक्दिनँ’ भन्ने युवाले गरे आफ्नै आमाको हत्या

काठमान्डौ, २० असोज: जेनजी आन्दोलनको क्रममा प्रहरीसँग विवादमा देखिएका एकजना युवा आफ्नै आमाको विभत्स हत्या गरेको आरोपमा धादिङमा पक्राउ परेका छन्।

धादिङको त्रिपुरासुन्दरी गाउँपालिका-५, थापाकटेरीका ३० वर्षीय यमबहादुर कँडेल जिरेले ५५ वर्षीया आमाको हत्या गरेका हुन्। जिल्ला प्रहरी कार्यालय धादिङका एसपी भेषराज रिजालका अनुसार यमबहादुरले आइतबार राति धारिलो हतियार प्रयोग गरी आमाको हत्या गरेका थिए।

घटनास्थलबाट हतियारसहित यमबहादुरलाई नियन्त्रणमा लिइएको र घटनापछि गाउँ नै स्तब्ध बनेको प्रहरीले जनाएको छ।

यमबहादुर भदौ २३ र २४ गतेका जेनजी आन्दोलनका भिडिओहरूमा धेरै भाइरल भएका थिए। सो भिडिओमा उनले ‘मेरो आँखामा डर छ, मलाई गोली हानेर मार्नुस्, म यो देश रोएको देख्न सक्दिन’ जस्ता अभिव्यक्ति दिएका थिए। प्रहरीले घटनाको थप अनुसन्धान गरिरहेको छ।