गुल्मीमा अविरल वर्षाका कारण दुई ठाउँमा सडक अवरुद्ध

गुल्मी: गएरातिदेखि परिरहेको अविरल वर्षाका कारण गुल्मीका दुई ठाउँमा सडक अवरुद्ध भएका छन् । सत्यवती गाउँपालिका–६ स्थित डहरे खोलामा पानीको वहाव बढेर सडक अबरुद्ध भएको जिल्ला प्रहरी कार्यालय गुल्मीका डीएसपी गङ्गा बहादुर सारुले जानकारी दिए ।

शुक्रबार बिहानैदेखि खोलामा अत्याधिक पानीको बहाव बढेपछि अहिले आवतजावत समेत रोकिएको छ । वैकल्पिक सडक नहुँदा यही सडकबाट आवतजावत गर्ने साना ठूला सवारी साधन सँगै यात्रु समेत प्रभावित भएका छन् । अहिले पनि निरन्तर पानी परिरहेको छ । यद्यपि तल्काल यस सडक खुल्ने सम्भावना भने देखिँदैन ।

त्यस्तै कालीगण्डकी करिडोर अन्तर्गत कालीगण्डकी गाउँपालिका–२ राक्सेमा पहिरो खस्दा सडक अवरुद्ध भएको छ । यस सडक सञ्चालनमा ल्याउनका लागि निरन्तर पहिरो पन्छ्याउने काम भइरहेको जिल्ला प्रहरी कार्यालय गुल्मीले जनाएको छ । जिल्ला विपद् व्यवस्थापन समितिका अनुसार गुल्मीका करिब २०० भन्दा बढी स्थान उच्च जोखिममा रहेका छन्। बिहीबार साझदेखि नियमित पानी परिरहेकाले यात्रा गर्दा सडकको अवस्था बुझेर मात्रै यात्रा गर्न प्रहरीले आग्रह गरेको छ। – अन्नपूर्ण पोष्ट