वा.वि.स.म., अन्तर्राष्ट्रिय समन्वय समितिको तेस्रो अधिवेशन सम्पन्न, अध्यक्षमा पुनः पाण्डेय

गुल्मी: वामी-विश्व सम्पर्क मञ्च, अन्तर्राष्ट्रिय समन्वय समितिको तेस्रो अधिवेशन सम्पन्न भएको छ। प्रा.डा. ईश्वरी प्रसाद पाण्डेयको अध्यक्षतामा सम्पन्न भर्चुअल भेलामा प्रमुख अतिथि राष्ट्रिय सभा सदस्य माननीय विष्णु कुमारी सापकोटा र विशिष्ट अतिथि पुर्व प्रदेश सभा सदस्य खड्ग केसी रहनुभएको थियो।

यस भेलाबाट वामी-विश्व सम्पर्क मञ्च, अन्तर्राष्ट्रिय समन्वय समितिका ८ जना पदाधिकारी निर्वाचित हुनुभएको छ। अमेरिकामा रहनुहुने प्रा.डा. ईश्वरी प्रसाद पाण्डेय पुनः अध्यक्षमा निर्वाचित हुनुभएको छ भने वरिष्ठ उपाध्यक्ष र उपाध्यक्षमा क्रमशः प्रा.डा. जीवलाल सापकोटा (काठमाडौं) र प्रा.डा. ज्ञान थापा (काठमाडौं) निर्वाचित हुनुभएको छ। त्यसैगरी महिला उपाध्यक्षमा शारदा शर्मा पौडेल (चितवन) निर्वाचित हुनुभएको छ।

क्यानडामा रहनुहुने रोमकान्त सापकोटा पुनः महासचिव पदमा निर्वाचित हुनुभएको छ। यसैगरी सचिवमा हेमनाथ खराल (दक्षिण कोरिया), कोषाध्यक्षमा राम केसी (काठमाडौं) र प्रवक्तामा बैकुण्ठ रायमाझी (चेक रिपब्लिक) निर्वाचित हुनुभएको छ। यस संस्थामा ५१ सदस्यीय कार्यसमिति रहने भएकोले यस बैठकले पदाधिकारी मात्र चयन गर्न सकेको र दोस्रो चरणको निर्वाचनबाट कार्य समितिले पूर्णता पाउने निर्वाचन समिति सदस्य रामचन्द्र सापकोटाले बताउनुभयो।

मुसिकोट नगरपालिका, वडा नं. ७ र ८ साविक वामी गाविसमा जन्मी हुर्केर देश विदेशमा छरिएर रहनुभएका वामेलीहरुलाई एकताबद्ध गरी जन्मभूमीको विकास, परोपकार र संस्कृति संरक्षण र प्रवर्धनमा महत्वपूर्ण भूमिका निर्वाह गर्दै आएको संस्थाका मूल समिति, अन्तर्राष्ट्रिय समन्वय समिति, विभिन्न देशमा शाखाहरू र इकाई रहेका छन्।

मुसिकोट नगरपालिकाका पुर्व मेयर सोमनाथ सापकोटा, पुर्व गाविस अध्यक्ष हरिनारायण सापकोटा, वामी सेवा समिति जापानका अध्यक्ष दिलिप थापा, वडा नं. ७ का वडाध्यक्ष हरिहर सापकोटा, वडा नं. ८ का वडाधक्ष रमेश विक, वडा नं. ८ का पुर्व वडाध्यक्ष नारायण सापकोटा, शिक्षक ज्ञानहरी सापकोटा, पत्रकार कमल पौडेल, पत्रकार दिनेश खाती लगायतको आतिथ्यता रहेको पहिलो सत्रको सञ्चालन महासचिव रोमकान्त सापकोटाले गर्नुभएको थियो भने दोस्रो निर्वाचन सत्रमा निर्वाचन मण्डलका संयोजक प्रा. डा. तारा प्रसाद सापकोटा, सदस्यहरु ज्ञानहरी सापकोटा र रामचन्द्र सापकोटाले गर्नुभएको थियो।