गलकोट बहुमुखी क्याम्पसमा निर्वाचन समिति गठन तथा निर्वाचन कार्यतालिका प्रकाशन

गलकोट: त्रिभुवन विश्वविद्यालय अन्तर्गत स्वतन्त्र विद्यार्थी युनियनको निर्वाचनका लागि गलकोट बहुमुखी क्याम्पसमा निर्वाचन समिति गठन तथा निर्वाचन कार्यतालिका प्रकाशन गरिएको छ।

आगामी चैत ५ गतेका लागि तोकिएको स्वतन्त्र विद्यार्थी युनियनको निर्वाचनका लागि गलकोट बहुमुखी क्याम्पसमा सहायक क्याम्पस प्रमुख चुडामणी शर्मा निर्वाचन अधिकृत रहेको निर्वाचन समिति गठन गरिएको हो। ३ सदस्यीय निर्वाचन समितिको सदस्यमा विभागिय प्रमुख सहायक प्राध्यापक विर बहादुर बोहोरा क्षेत्री र कृष्ण बोहोरा रहेको क्याम्पस प्रमुख मुकुन्दसिंह भण्डारीले जानकारी दिनुभयो।

त्रिभुवन विश्वविद्यालय कार्यकारी परिसद्को निर्णय नं. ५ सय ६५ र स्वतन्त्र विद्यार्थी युनियन निर्वाचन सम्बन्धी निर्देशिका २०८१ अनुसार स्वच्छ, स्वतन्त्र र भयरहित वातावरणमा निर्वाचन गर्नका लागि समिति गठन भएको क्याम्पस प्रमुख भण्डारीले बताउनुभयो।