राष्ट्रिय खेलकुद परिषदको बोर्ड सदस्यमा गुल्मीका हिमाल श्रेष्ठ नियुक्त

गुल्मी, पुस २१ । नेपाल सरकारले गुल्मीका युवा नेता तथा जिल्लाका पुराना खेलाडी हिमाल श्रेष्ठलाई राष्ट्रिय खेलकुद परिषदको बोर्ड सदस्यमा नियुक्त गरेको छ । पुस ९ गतेको मन्त्री परिषद निर्णयले श्रेष्ठलाई परिषदको बोर्ड सदस्यमा नियुक्त गरेको हो ।

उनि सहित बोर्डमा नियुक्त भएकाहरुलाई पुस १९ गते पद तथा गोपनियताको सपथ ग्रहण गराईएको थियो भने आज पदभार ग्रहण गर्ने कार्यक्रम रहेको छ ।   गुल्मी जिल्लाबाट राष्ट्रिय खेलकुद परिषदको बोर्ड सदस्यमा सम्भवतः श्रेष्ठ नियुक्ती हुने पहिलो ब्यक्ती भएको बताईन्छ ।

नेपाल खेलकुद महासंघ लुम्बिनी प्रदेशको संयोजक समेत रहेका श्रेष्ठको घर रुरुक्षेत्र गाउँपालिका १ रिडी हो । उनी गत स्थानीय तह निर्वाचनमा रुरुक्षेत्र गाउँपालिकाको नेकपा एमालेबाट अध्यक्ष पदमा झिनो मतले उपविजेत बनेका थिए ।

त्यसै गरी लुम्बिनी प्रदेश बाटै परिषदको उपाध्यक्ष पदमा धुर्ब आचार्य नियुक्त भएका छन । उनि मदन भण्डारी स्र्पोटर्स एकडेमीका केन्द्रिय अध्यक्ष समेत हुन । प्रधानमन्त्री संरक्षक रहने परिषदको अध्यक्ष युवा तथा खेलकुद मन्त्री रहने प्रवधान छ । आफु सहित ९ जना ।

मन्त्री परिषदले नियुक्त गर्ने ११ जना हुन्छन । बोर्डमा टंकलाल घिसिङ्ग  सदस्य सचिव रहेका छन । ११ जना मध्ये सदस्य सचिव र एक जना बोर्ड सदस्यको म्याद अझै बाँकी रहेकोले हाललाई आफु सहित ९ जनाले नियुक्ती पाएको नवनियुक्त बोर्ड सदस्य श्रेष्ठले बताए । त्यसो त नेपाली सेना , नेपाल प्रहरी, सशस्त्र प्रहरी विभिन्न सघ संस्थाका प्रतिनिधीहरु पदेन सदस्य हुने गर्दछन ।

परिषद सदस्य र पदाधिकारीको चार बर्षे कार्यकाल हुन्छ । परिषद सदस्यको ओहदा नेपाल सरकारको सहसचिव सरह हुने गर्दछ ।