हजुरबुवाको मलामी हिडेका गुल्मीका ज्ञानबहादुर मृत फेला

​गुल्मीको मुसिकोट नगरपालिका वडा नं. ४ दिगामचौरका ३१ वर्षीय ज्ञानबहादुर कुमाल बागलुङमा मृत अवस्थामा फेला परेका छन्। मावली हजुरबुवाको निधन भएपछि मलामी आएका उनी बागलुङको बडिगाड गाउँपालिका वडा नं. २ सिमलचौर नजिकैको सामुदायिक वन क्षेत्रमा मृत भेटिएका हुन्।

​प्रहरीका अनुसार गत असोज ४ गते मावली हजुरबुवाको निधन भएपछि उनी काजकिरिया र मलामीका लागि सिमलचौर आएका थिए। त्यसको भोलिपल्ट घाँस काट्न जान्छु भनी निस्किएका कुमाल एकाएक बेपत्ता भएपछि आफन्तले प्रहरीमा खबर गरेका थिए।

​आफन्तको सूचनाका आधारमा खोजतलास गर्ने क्रममा आज बिहान करिब ८ बजेको समयमा उनको शव भिरमुनि फेला परेको ईलाका प्रहरी कार्यालय हरिचौरका प्रमुख प्रहरी निरीक्षक डम्बरबहादुर बोहराले जानकारी दिनुभयो।

​प्रारम्भिक अनुसन्धान र शवको प्रकृति हेर्दा असोज ५ गते नै भिरबाट लडेर उनको मृत्यु भएको हुन सक्ने प्रहरीले अनुमान गरेको छ। घटनाका सम्बन्धमा प्रहरीले थप अनुसन्धान अगाडि बढाएको छ। 
मिति : २०८३ असोज ९ गते
ओझेलका खबर — खबरभित्रको खबर